Виктория Матвеева. Сылнымут аршаш.
Йӧратымем, колат?
Ок тол алят омем.
Ӧндалынат гынат,
Тый лишкырак лишем.
Уремыште поран
Ок му ик верымат.
Палет, мый мом манам,
Ом воштыл, йӧршынат.
Айда, коден пашам,
Тораш кудалына.
Жаплан монден олам,
Камчаткыш каена.
Сӱретыште тыгай
Кумдалык, йоҥгата.
Кеч кушкыла ит кай,
Кава почеш покта.
Да курык-влак «шӱлат»,
Тыгайым ужынат?
Ала изи коча,
Коҥгаш олтен шинча.
Тышечынак лӱҥгалт,
Эҥер-влак йыр йогат.
Эн лишыл кажнылан
Лияш чон-эрыкан.
Эше мом ойлынем…
Мый теҥызым ужнем.
Таптеҥызым, кугум,
Шып маныт кудым, юм.
Ты вӱдыштӧ шогат
Да серым оролат
Кум шольо-иза-влак,
Кӱ патыр ман лӱмдат.
Эше тый колыштат?
Мален ом керт садак.
Шинчаланем коеш,
Кузе ош пыл иеш.
Шогалын пуйто жап-
Ок вашке нигӧат.
Пӱртӱсым колышташ
Кӱлеш лач тыш толаш.
Шем тупшым ончыктен,
Касатке йӱштылеш.
Колта гын йӱкланен,
Вашештыме шуэш.
Камчаткыште, ойлат,
Маска-влакат илат.
Оҥайын ошкеда
Кӱрен торешчапа.
Ты верыште лийнем,
Келшет вет мый денем?
Эрден кынелына,
Билетым ончена?
Вашлийза те, вашмийыза, кунам тендам вучат.
Кок шӱмын ужмо-шумыжо тек шукталтеш тачат.
Кеч йыҥгыр ден пелештыза, кунам йӱдвошт шонат.
Ок чыте тиде орлыкым эн пеҥгыде еҥжат.
Вашештыза, каласыза, кунам туран ончат.
Шинча — воштончыш маныт кеч, кузе кӱлеш мутшат.
Ида чамане шокшыдам, ласкалыкдам, тулдам,
Тунам кавасе кече гай лий(ы)да ик кумылан.
Да кодыза торжалыкым, молан арам сыраш.
Мыняр йӧратымашым йӧртен умылыдымаш!
«Кертеш айдеме шкетын, шкет,»-саман ойла гынат,
Кок шӱмын ужмо-шумыжо тек шукталтеш тачат.
Лий тый кече,
чон пайрем,
волгыдо сескем.
Ончалмет ден ырыктен
керт кугу мландем.
Лий аралтыш,
лий йолташ,
чоным луштараш.
Тылзе семын шыматаш
тол омеш малаш.
Тол йӱр семын,
ӱмбакем
вӱдыжгым волтен.
Кеҥеж кечын нӧрынем
капкайымалнем.
Тый палдаре
мыланем
шке улмет нерген.
Шӱм воктенак
пеленем
йоратымашем.
Кап мучко тыгай лывырге кая.
Кунам мый пӧртылам торасе вер гыч,
Вучет мо вашлиймашым, кӧ пала.
Тыгак шуйна пакча шенгалне корно,
Пасу кокла гыч эртышым ӱжеш
Да нынгая…шонет, кеч Моркыш.
Кастене тудын тулжо йылгыжеш.
А мый волем пеледше олык лапыш.
Ала молан гын мӧрӧ ӱдыр-влак
Изи годсек вуйшӱдышым ыштат.
Тыге лач портылам мый йоча жапыш.
Вара эртем пошкудо ял уремым.
Могай ужаргын тудо шыргыжеш!
Кеҥеж лоҥгаште вашлияш у эрым
Вашкем вӱд сер дек ӱжара почеш.
Чонемым пуйто мамык ден леведыч,
Кап мучко тыгай лывырге кая.
Кунам мый пӧртылам торасе вер гыч,
Ялем, палем, вучет тыят,
Кеч корнына кокланже ойырла.
Шыргыжал мылам, кончем гын угыч омыштет.
Лӱмын огыл, шарналтен кеч. Мом гын тый ыштет?
Мом пелйӱкын муралтет? Могае кумылет?
Шыргыжал, йодам, толам гын угыч омышкет.
Шыргыжал туге, кузе эре вашлийынат:
Пуйто коктын йомынна ваш-ваш шинчасорташ.
Кызытат, ончалын пӧртысӧ окна яндаш,
Шарналтем, кузе ваштарешем ошкылынат.
Ну а мый вара, ончалын сото шинчашкет,
(Ах, мыняр гана вет йӱленам кӱреныштет)
У ласкалыкым налам, садланак ойлынем:
Шыргыжал мылам, эртен кает гын воктечем.
Оралгыше лышташ тӧшакым,
Ик верыш чумырен,
Погем.
Толеш гын шошо, лум йымачын
Шулен лектеш ару урем.
Кертшаш ыле чыла осалым:
Мо лийын, уло-
Кораҥден.
Ала тунам сита ӱнарна
Илаш, ош телым йӧратен.
Мый мондынем эн йӱштӧ телым,
Чон шокшым
Лумыш чӱчыктен.
Ом пыште вачыш йӧсым-нелым,
Мардежлан тудым кучыктем.
Коклан пыта гын йыжыҥемже,
Коҥгатулемым
Ылыжтем.
Шинчасорташке ончалмеке
Адак шижам тылат кӱлмем.
Оралгыше лышташ тӧшакым,
Ик верыш чумырен,
Погем.
Толеш у шошо да ялемым
Сылнештара ару урем.
