Марий тамган корнем
Марий улам. Тиде ой лӱмем дене иктак. Ты лӱмым ойырен але кӱчен налын омыл. Тыгай мыйын тамгам. Весым ойыраш пуэн огытыл. Изиэм годым «Марий лийнет але иктаж вес калыкын падырашыже лият ыле?» манын, нигӧ йодын шоген огыл. Кугезе тукымем, коча-ковам, ача-авам марий улыт, сандене саде тамга мыламат пижын. Марий йылме ешыштем шочмо йылме семын озаланен. Мыйым тудын кажне чатка савыртышыжым колаш, палаш, шижаш туныктеныт. Шочмо ял уремыштемат весым колын омыл. Пошкудо-влак ма, уло ял калык – чылан марла саламлалтыныт, мутланеныт, каҥашеныт. Манеш-манешымат марла колтылыныт, эсогыл вурседылыныт марла. Сӱретан яшлыкат марла лодыманден, мыланем, изилан, мурымашым да куштымашым ончыктылын. Радио маналтше оратажат саде йылме денак саламлалтын, игечым ойлен, марий муро дене кумылым нӧлтен…
Мый марий Сандалыкыште кушкынам. Тыге шкеат, тиде йылмысе мут-влакым кучылтын, шонымашем марла почын пуаш тӱҥалынам. Куанаш, ойгыраш, воштылаш да шорташ.
Мый марла кушкынам. Ковамын эр кече вашеш шогалын, порылыкым, тазалыкым, серлагышым йодын пелештыме мутшым колын, вийым шижынам. Авам дене пырля емыж-саскалан, поҥгылан чодыраш мийыме годым Чодыра Озалан пелешташ тунемынам, атым темен лекме годым тауштенам, вуем савенам. Адак марла. А икана шӱргем мучко, вуем мучко ала-могай шучко чӱнча-влак (чӱнча веле мо, йора-влак!) лектын пытеныт. Ачам эртыше кечылаште кушто да кӧ дене вашлиймем, мутланымем нерген йодышто. «Локтеныт, ӱдырем» мане да марий шӱвалме мутым палыше Кычи кува деч ала-могай вартышым шӱвалыктен кондыш. Эрлашымлан чурийыштем йора-влак деч ик палат ыш код… Изи лийынам, но чыла эскеренам, ужынам, шижынам, ӱшаненам. Шке калыкемын йӱлажым аклен, тӱвыражым йӧратен кушкынам.
А эше школышто марий йылмым тунемме тетрадешем «Шочмо йылме…» манын возенам. Тыге ешыште налме шинчымашым правил-влак почеш кучылташ тӱҥалынам да шочмо йылмемын сылне мутшо, ойжо-влакым чаткан возаш тунемынам. Марла!
Марий – тиде мыйын тамгам, пӱрымашем, илышем. Мый дечем йодын огытыл? — Таче мый тидлан тауштен илем! Таче мый МАРИЙ корным ӱшанлын такыртем, шке тамгамым саклен нумалам. Ынде марий калыкемым, тудын йӱлажым, тӱвыражым йӧратымем нерген тыланда шочмо йылмем дене ойлем, возем. Марла! Эше мурем, коклан шортам да воштылам. Калыкем дене пырля. Тендан дене пырля, тыгаяк МАРИЙ ТАМГАН йолташем-влак дене пырля…
Тиде ынде – чон йодмо почеш, шке ойырен налме корнем. ТАМГАн корнем. Такыртем тудым. Весым ом кычал. Вес семын ом мошто.
