У ШӰЛЫШ ДЕНЕ ПАШАМ УМБАКЫЖЕ ВИКТАРА
Шукерте огыл республикыштына «МолодЙошка» форум гӱжлыш. Очыни, шукын ты мероприятий нерген ужында, колында. А кузе тушто участник-влак иленыт? Могай шонымаш дене мӧҥгышт пӧртылыныт?
Тидым ме чолга туныктышо, самырык парламентарий Юлия Четкарева деч пален налына:
– «МолодЙошка» форумышто «Креативная мастерская» сменыште лийынам. Йодмашым возымо годым лӱмын ты виктышым ойыренам, медиа аланыште шке шинчымашем келгемдаш шоненам.
Тушто мемнам постым возаш, съёмкым эртарыме годым мом шотыш налаш туныктеныт. Тыгак пашам ышташ кумыл уке гын кузе тидын деч кораҥаш умылтареныт, да соцсетьыште шке данныйым аралымаш кӱлмӧ нерген каласкаленыт. Программына моткоч поян лийын, пелйӱд деч вара гына малаш возынна. Шуко уым пален налынна. Мутлан, мемнан деке Республикысе Самырык-влакын полатыште медиацентрым вуйлатыше Ольга Малова, блогер «Качыри Бавай», фотограф Мария Плотникова, «Марий Эл» ГТРК-ан радиовещаний службым вуйлатыше Константин Мягчилов да молат толыныт.
Кажне кастене тӱрлӧ квиз, квест, мастар-класс-влак эртаралтыныт. Иктыштыже мыят шке надырем пыштенам: «МолодЙошка» форум нерген шарнымаш брелокым ямдылыме годым ой-каҥаш дене полшен шогенам.
Форум мучко чолгалыкым ончыктышо ӱдыр-рвезе-шамычым балл дене палемденыт.
Пытартыш кечын иктешлымашым ыштеныт. Моткоч вучыдымо лийын, кунам мыйын лӱмем сеҥыше радамыште йоҥген. Мыланем тӱҥ призым – фотосессийым да «Астрон» спорт клуб деч куандарыше пӧлекым кучыктеныт.
– Тӱрлӧ вашлиймаш могай гынат у шонымашым шочыктен, шинчымашым келгемден. А кушто чыла тиде «погым» кучылташ тӱҥалат?
– Эн ондак соцсетьыште шке лаштыкем вияҥдаш тӱҥалам. Тылеч посна Шернур посёлкысо 2-шо номеран школын лаштыкым вӱдымаште тыршем. «Орлята» тӱшка да шке классем денат тӱрлӧ видеом ямдылена: школ илыш, саламлымаш, конкурс. Сандене мыланем шинчымашым пойдараш кӱлынак. Вет кунам эре ик сынаным ыштет, оҥайла ок чуч. А ынде шонымаш шуко!
Эшежым Шернур районысо Самырык-влакын парламентшын тӱшкажым вӱдаш полшем. Туштат шинчымашем пайда лиеш манын ӱшанем.
Форумыш шинчымашым келгемдаш, чолга еҥ-влак дене палыме лияш, шке моштымымат ончыкташ шонен миенам. Вес гана ӱжыт гын уло кумылын каем!
Теат тыгай йӧн дене эре пайдаланыза!
