Тӱням чонжо дене шижеш
Провой вел Кожласола ялын ӱдыржӧ Карина Ватютова шуко еҥлан Изи Карина семын палыме. Яндар йӱкан, поро, волгыдо кумылан ӱдыр 21 июньышто 15 ийым тема. Карина моло йоча деч тазалык шотышто ойыртемалтеш гынат, тудын чонжо чылалан почмо, у йолташ-влаклан ӱдыр моткоч куана.
Кузерак ила марий калыкын яндар йӱкан изи шӱшпыкшӧ? Усталык пашаже кузерак вораҥеш? Тидын нерген ме Карина да тудын коваже Лидия Пантелеевна дене мутланышна.
«Тений ноябрьыште Москошто мурызо Диана Гурцкаян «Белая трость» муро фестивальже лиеш. Тушко Марий Эл гыч ик участник кайышаш. Республикнан калыкым социально аралыме да паша министерствыже Каринам ойырен налын. Условий почеш 30-шо июнь марте видеом колтыман. Тыгай фестивальыш тылеч ончыч ик гана миенна ыле. Диана Гурцкая дене вашлийынна. Тений полыш лиеш гын, адак каена», — мане Каринан коваже.
– Лилия Пантелеевна, кӧ деч да могай полышым вучеда?
– Москош каяш вет окса кӱлеш. Полшаш кумылан-влак лектыт, шонем.
– Мурым возымо паша кызыт кузерак кая?
– Возышашлык муро пеш шуко, но кызыт икымше верыште – тазалык. Шукерте огыл Чебоксарыш миенна, пулвуйыш операцийым ыштышт. Операцийым тӱрлым эртенна: онкологий, шинчалан, йоллан. Тупешыже образований лектын ыле. Кызыт чыла сай. Ынде пеш шуко тӱрлӧ аппарат кӱлеш. Белая трость манме аппаратын (тудо сокыр йочам вӱден кая) акше 84 тӱжем теҥге. Велотренажер кӱлеш, беговой дорожко. Чыла шке налман. Коляскым гына соцзащите пуэн.
– Каринан семӱзгаржат шуко. Тудымат шкеак наледенда?
– Гармоньым, баяным, фортепьяном, синтезаторым – чыла шкеак наледенам.
– Спонсор-шамыч уке улыт мо?
– Мый кычалын омыл. Иктымат. Кидым шуялтен коштмем ок шу. Сольный концертым ыштенна ыле, тунам изишак полыш лие. Таче гына Марий самырык театрын вуйлатышыже Александр Васильевич Бирюков дене телефон дене мутланышым. Шыжым Инвалид-влакын декадыштлан концертым ышташ кутырышна. Тыге шке вий денак толашена.
– Тау, Лидия Пантелеевна, вашмут-влаклан. А ынде йодышем Кариналан лиеш. Карина, кызыт концертлашке коштат? Кушто выступатлет?
– Ме «Провой сем» ансамбльым чумыренна. Тушто Евгений Филиппов, Галина Якушева да мый мурена. Трио маналтеш. Репетицийым ыштена, номерым ямдылена. Вара яллашке коштына.
– Концертлаште мураш келша?
– Пешак келша. Тушко пешак сай зритель-шамыч погынат. Совым кырат, кычкырат: «Ура! Ууу!»
– Мурыметым йӧратат, тугеже?
– Да, йӧратат.
– А тый мурылан почеламутымат шке возет?
Почеламутым шкеак возем. Ковай полша. Эн ондак семым шонем, вара мутшым.
– Мо нерген мураш эн чот йӧратет?
– Мый романтический мурым йӧратем. Лирикым.
– Мыняр мурет уло?
– Муро-влак шуко погыненыт: «Арале элемым», Раисия Данилова лӱмеш «Рая кокайым шарнем» да молат. 14 ийым темымылан «У паспортем – кидыштем» муро шочо. Эше зарубежный муро-влак улыт. Чылаже 7 йылме дене мурем.
– Мурет-влак радиоштат йоҥгат вет?
– Радиошто вич муро уло.
– Мом эше ышташ йӧратет?
– Кочкаш ямдылаш. Пучымышым, шӱрым, пареҥгым шолтем.
Каринан поро, тыматле кумылжо моткоч ӧрыктарыш. Тӱням шинча дене ужын ок керт гынат, чонжо дене моткоч сайын шижеш. Шке йӧратымашыжым еҥ-влаклан муро гоч пӧлекла.
Лидия Пантелеевнан концерт нерген каласымыже шукталтеш манын, ӱшанена. Чыла сай лиеш гын, шыжым ме Каринам Йошкар-Ола сценыште ужына.
