«Сылнымут унагудыш» пагален ӱжына!
«Сылнымут унагудо» — тыге маналтын «Чонволгалтыш» сылнымут семинар-лабораторийын (вуйлатыше – Альбертина Иванова) черетан вашлиймашыже. Тудо 13 ноябрьыште Калык тӱвыра пӧртыштӧ эртаралтын.
Вашлиймашым ты гана «квартирник» сынаным ышташ палемдыме, садлан погынымашыш чыла кумылан-влакым ӱжмӧ. Кастене паша деч вара, ӱстел йыр погынен, шокшо чайым подылын чыланат поэзий тӱняш пурен кайышна.
Эн ончыч кугурак поэт-влакын почеламутыштым колыштна. Альбертина Иванова лирике сынан почеламутым лудын гын, Альберт Васильевын илыш нерген шонаш таратыше почеламутшо-влак йоҥгалтыч. Геннадий Сабанцев шукерте огыл возымо поэме гыч ужашым лудо. Элым аралыше тӱҥ геройын пӱрымашыже ӱстел йыр шинчыше вес поэт-влакын шинчавӱдыштымат лукто.
Сылнымут унагудыштына чылан гаяк почеламутыштым лудыныт. Кажне сылнымут саска шонаш таратыше лийын, садлан южгунамже кумылан-влак шке шонымашыштымат луктын каласеныт.
Кок шагатат пеле жап моткоч вашкен эртен кайыш. Вашлиймашыште шуко почеламут йоҥгыш гынат, жап пуйто ситен огыл. Сандене тыгай «квартирник»-влакым умбакыжат эртараш кутырен келшышна. Вес вашлиймаш, очыни, У ий вашеш лиеш.
Альбертина Иванова:
— Тачысе пагытыште, кунам ме чылан изишак шаланыше улына, кунам кажне шке илышыж дене ила, тыгай мутланымаш моткоч кӱлешан. Икте-весе деч посна ме илен огына керт, каласыме шуэш, мо ышталтын, мо нерген возена, умылат мо мемнам але огыт умыло лудшына-влак.
«Квартирник» сынан вашлиймаш мыланна официальный деч кораҥаш полша, ласкан шинчын, йолым йол ӱмбак пыштен, тыгодым нимогай кышкарым эскерыде лиеш. Тыште кӧ кузе мошта, туге ойлен кертеш, мемнан коклаште кугурак да изирак-влак уке, ме ик еш улына.
