Суксо кундемысе «Эр ӱжара»
Тений Йошкар-Олаште эртаралтше «Пеледыш пайремыш» элнан тӱрлӧ верже гыч шуко марий коллектив погынен. Нунын коклаште Пермь кундем Суксо район Кызганде ялысе «Эр ӱжара» коллективат лийын.
Ансамбльым 1990 ийыште чумырымо. Теве кузе тудо татым шарналта ансамбльым вуйлатыше Надежда Савватеевна Спиридонова:
— 1990-шо ийыште Пермь кундемыште илыше марий-влакым Марий Элыште эртаралтше финн-угор калык-влакын икымше Тӱнямбал фольклор фестивальышкышт ӱжыныт. Шарнем, ме Волжский районыш миенна, мемнам пеш сайын вашлийыныт.
Фестиваль деч вара шкенам шке аклымаш чон кӧргыштына пуйто нӧлталалтын. Пермь кундемыште марий тӱвырам вияҥдаш кӱлеш манын раш умылышна, вет ме тыгай мотор улына, тӱвырана, йӱлана моткоч поян! Тыге икмыняр жап гыч «Эр ӱжара» ансамбльым погышна.
Кызыт ме шке кундемысе Марий национально-культурный рӱдер пелен чумыргена. Ансамбльыштына 7-8 участник улына. Молан тыге? Ик жап коллективнан участницыже-влак вахте йӧн дене вес кундемыш пашаш коштыныт. Икте кая, весе толеш. Вара адак вашталтыт. Ондакысе составын участникше-влакат коклан толыт.
Репертуарыштына утларакше тошто марий калык муро-влак улыт. Пытартыш жапыште тыгай муро-влакым марий эстраде аланыште тыршыше мурызо-влак чӱчкыдын шке репертуарышкышт пурташ тӱҥалыныт. Мыланнат нуно ожнысо мурым аралымылан ик гана веле огыл тауштеныт. Сӱан мурына пеш мотор. Но тудым концертлаште тыглай мурен кошташ ок йӧрӧ. Уна муро-влакым кид пуэн мурена. Нуным эше кугезе коча-кована-влак лач тыге, кидыштым вашла пуэн, муреныт. Тиде йӱлам ме кызытат аралена. Шарнем, изиракем годым мӧҥгыштат ача-авам тыге муреныт. Ожно пошкудо-влак вашла келшен, полшен иленыт. «Тый сӱаным эртараш полшет гын, вес гана мыят тыланет полшем», — маныт ыле…
Чынжымак, Пермь кундемысе вате-влак тошто мурыштым аралаш тыршат. Теве «Пеледыш пайрем» годымат кок мурым тугай чаплын муралтен пуышт! Нуным колыштын, чонышко пуйто ласкалык шыҥа.
