Шупшал аватын кидшым…
Светлана Алексеева
***
Авай тачат толмемым вучыш,
Вашлие мыйым тошкемеш…
Ах, тиде татым ӱмыр кутыш
Туге чот шуйымо шуэш.
Лыжган ӧндале да вӱчкалтыш –
Кечат йоллам шуя туран.
Авайын мый улам чӱчалтыш,
Садланак шӱм-чонем муран.
Ойлет, авай, а мут – эм, полыш,
Ушан-шотан, юж гай кӱлеш.
Аралтыш – мамык, шокшо помыш,
Поян чесет йоча лӱмеш.
Авам пелен тӱня волгалтше,
Шинчавӱдат куан чинчан.
Виян вашкыл мемнан коклаште,
Пиал – яндар памаш шинчан.
Авай тачат толмемым вучыш,
Вашлие угыч тошкемеш…
Надежда Рыбакова
***
Шуко теҥыз, эҥер, ер кокла гыч
Ойырен налам умдыр пӱям.
Вӱд воктен эн ӱшанле йолташ ден
Ракывотым кушан погенам.
Сайлаш йодыт иктаж чодырам гын,
Пуэм йӱкым тошкем куэрлан –
Утарен шокшо деч шудо жаплан,
Кумыж шӱшпык йоҥген веселан.
Вашталташ шоналтет гын пачерым,
Могай пӧртым вара тый налат? –
Кӱза кумылжо кушто ешемын,
Чон кана изинат, кугунат.
Мом гына огына керт ме налын,
Вашталтен, ужален, ойырен,
Но нигӧ ок алмаште, тый пале,
Мыйын поро, шыма авием.
Нина Изибаева
Шупшал аватын кидшым…
Шупшал аватын кидшым тамлын
Пӧлекле порын шыргыжмет!
Пычкемыш йӱдым коден омым,
Эр марте пӧрдын воктенет!
Шупшал аватын кидшым тамлын,
Йӧратымаш пушан копам.
Шыман шинчашкыже ончалын,
Сӱретле кечым, ош кавам!
Шупшал аватын кидшым тамлын,
Тӱняште лишыл укеак!
Эрташ полша шем кочым, йӱштым,
Ава – ӱшан сескем тылат!
Шупшал аватын кидшым тамлын,
Ит чаманал ласка мутет!
Шинчаж гыч ӱштыл кочо вӱдым,
Пыштен вачешыже вует!
Шупшал аватын кидшым тамлын,
Таушто, лийын ваштареш.
Тыштак. Шыпак. Монден шагатым,
Эрла вараш кодаш лиеш!
Нина Щербакова
Арале тый аватым
Ава пиалым палышым тӱняште,
Изи ньогам ӧндальым оҥ пелен.
Йыл-йыл йӱлен тунам тыйын шинчатше,
Чот йӱкым луктын, нальыч магырен.
Куан ден теме шӱм-чонем – шыч пале..
Изи падыраш кизатым рӱзалтен,
– Авай, ончал, воктене тый шыч мале…
Изи йоча аваж ден кутырен.
Аважын лийын сомыл, лач шӱй даҥыт,
Я иктым, весым тӧчыш чумыраш.
Но кӧргӧ чонжо дене кӱртньӧ маныт,
Тыгай ава ден куштылго илаш.
Ончалын, пелештеныт ӧрын, ужын –
Аважын шӱмжӧ мамык пыстыл пун.
– Арале, тый аватым – шуко ужын…
А эргымже, ужат, лач кушкын шуын!
Людмила Семенова
Ава шӱм
Шочын вучымо йоча,
Пуйто шинчашкет онча.
Ынде тый улат ава,
Тудлан – волгыдо кава.
Ава шӱм – куан памаш,
Йӧратен мошта улмаш.
Кушмо кечыжым шотла,
Ниялтен ӧндал колта.
Юмо деч ава йӧдеш:
«Тек йочам таза лиеш.
Кушкылда, куандарен.
Илышнам уландарен».
Ава шӱм чот ойгыра –
Могай корным ойыра?
Кушкын вучымо ньога,
Жап икшырымын йога.
Ава шӱм – чон ойгырымаш,
Йочаж верч коршта улмаш,
Йӱдшӧ-кечыже иша –
Тӧрсыр илышын кыша.
Юмо деч ава йодеш,
Шинчавӱдшым ӱштылеш:
«Сайым пу йоча чонеш,
Тек таза, шотан лиеш».
Ольга Эльтемерова
Ужар аза
Могай пиал лияш Ава!
Ача «Ур-р-ра!» манеш, тава.
Тӱням марий йоча ужеш,
Ок чыте чон, мураш ӱжеш.
Ава йочам илаш ышта,
Кучен кидеш, шепкаш пышта.
Я оҥ пелен ӧндал куча,
Чукайын кушмым чот вуча.
Тугай изи ужар аза,
Ончен-куштет – лиеш таза.
Кеч кап копашке вел пура,
А вуйым вет нӧлта тура.
Ава уке гын, чот кара,
Нимом ышташ ӧрат вара!
Рӱзен-рӱзен, нумал коштат…
Кузе ньогам пышташ тоштат?
Азан куан – шӧран чызаш,
Аван парням куча кизаш.
Кидшӱм шке еҥжым вик пала,
Кочмеке, пеш ласкан мала.
Почеш коклан ужар шинчам,
Кузе чытет налде ӱмам?
Кучет ӧндал, шыман вӱчкет,
Луштен чонет, шижде чӱчкет.
Ална Алкече
Авамлан
Чиен шынден марий шымакшым
Авам гай койшо чуриян,
Вашка ош кече шем саманыш.
Ыресше черкын ший тӱсан.
Авам шога эрдене эрак
Шнуй Юмо дене мутланен.
Вет илыш — тиде кочо-шере.
Пиал озалан тауштен,
Йодеш авам: «Йочам переге».
Тазалыкым – ньогам ончаш.
Кунам икшыве ава дене
Куанланат уке мучаш.
Тый чытенат пеш шуко нелым.
Шып пелештет: «Тау, суксем».
Да савырет тый илыш телым
Эр ӱжараш моткоч вашкен.
Авамын вурсымо ший мутшо.
Кеч мокталта оньыкува.
Кава ден мланде иктыш ушно.
Тек чаплана чап лӱм – «Ава».
Шинчам гын угыч Юмын кидыш
Аза чон дене шонкален,
Толнем тӱняшке тиде ешыш
Авамым угыч ойырем.
Тылат возаш почеламутым
Кагазыш огыл, ош пыллаш.
Ты серыш дене таумутым
Ший шӱдыр ден сӧрастараш.
Галина Сайтаева
***
Суртем гычын илем торлалын,
Ӱжеш чонем мӧҥгем садак,
Авам кеч шукертак шоҥгемын,
Коеш мыламже рвезылак.
Авай, шочшет пала шкежат,
Лияш ава пелен пиал,
Мый пеш пашан улам гынат,
Ом мондо тый декет толаш.
Аван шӱм шошым арала,
Кӱлеш, шылталышын коеш,
Чучеш йочалан суксыла,
Кунам кӱлеш, полшаш толеш…
Авай, омеш кончет мылам,
Ом му вашталтышым тылат.
Ночкештше шинчатым ӱштылал,
Чонем ден кӱдынет улам.
