Шошо нерген калык пале-влак

Нине калык пале-влак А.Е.Китиковын 1977 ийыште савыкталтше «Марий калык пале-влак» книгаштыже возалтыныт. Автор посна ой-влакым Марий кундемыште илыше-шамыч деч гына огыл, тыгак моло кундемлаште илыше марий-влак дечат поген. Тидыже поснак оҥай.
Калык палым могай кундемыште ойлымым скобкышто палемден кодымо.

• Шыжым эҥер вашке кылма — шошат вашке толеш.
  (Медведево район Люльпан)
• Эҥерын ий йымалне 26 арня шинчымекыже, шошо толеш.
  (Медведево район Нужъял)
• Телымсе кава нӧлталташ тӱҥалеш – шошо лишемеш.
  (Тошто Торъял)
• Овда (тумна) кычкыра – шошо лишемеш.
  (Одо кундем, Маскаял)
• Телым лум кӱжгӧ гын, шошо ячыланен эрта.
  (Оршарке район Тошто Крешын)
• Лум ондак шулаш тӱҥалеш – шошо кужун шуйна.
  (Морко район Кокласола)
• Леведыш тӱр ий кужун шуйналтын кеча – шошо йӱштӧ лиеш да кужун шуйна.
  (Звенигово район Яктерлӱвал)
  
• Овдоким кечын чывылан йӱаш ситыше шинчыше вӱд уло – шошо вашке толеш.
  (Марий Турек район Кӱшыл Турек)
• Комака шындыме кече (Благовещенье) ончыч шырчык толеш – шошо эр лиеш.
  (Свердловск кундем Кӱшыл Бардым)
• Тер кудалтыме кечын (Благовещенье) кылмыкта – 12 кече тер корно лиеш.
  (Звенигово район Олыксола)
• Тер кудалтыме кечын кылмыкта — шошо кужун шуйна да йӱштӧ лиеш.
  (Татарстан, Мандык)
• Тер кудалтыме кече чывылан вӱд лиеш – шошо эр толеш.
  (Морко район Унчо)
• Тер кудалтыме кечын корно лиеш – шошо ик арнялан шуйна.
  (Кужэҥер район Марий Шой)
• Марий сорта (Кугече) йӱдым кылмыкта – Семык марте ок тӧрлане. Нылле кылме эркын эрта.
  (Советский район Кӱрсола)
• Страстная неделя мардежан – шошо ага врема худа.
  (Горьков кундем д. Большая Юронга ял)
  
• Овдоким кече ояр – шокшо шошым вучыман.
  (Пошкырт кундем Нуриман район Педий)
• Овдоким кече деч ожно шем корак толеш – шошо вашке толеш.
  (Свердловск кундем Кшыл Бардым)
• Пургыж тылзыште шем корак толеш – шошо эр лиеш.
  (Морко район Ӱлылсола)
• Пургыж тылзыште вӱд коеш – Ӱярня тылзе леве лиеш.
  (Кужэҥер район Йывансола)
• Маска арка верыш малаш возын – шошо вашке толеш да писын эртен кая.
  (Советский район Роҥго)
• Шордо эр кошташ тӱҥалеш – шошо ондакрак толеш.
  (Медведево район Чернушка)
• Шордо вара коштеш – шошо кужун шуйна.
  (Марий Турек)
• Шокшо элла гыч кайык тӱшкан толеш – шошо писын эрта.
  (Морко район Весьшӱргӧ)
  
• Шиште кужун перкала – шошо кужун шуйна.
  (Марий Турек Мосара)
• Шемгорак толмеке, лум тылзе кия.
  (Медведево район Актугансола)
• Шемгорак толмеке, тылзе гыч орава корно лиеш.
  (Кужэҥер район Марий Шой)
• Шемгорак ден турий ондак толыт – шошо леве лиеш.
  (Советский район Кундышӱмбал)
• Корак-влак эр шошым йӱштылыт гын, шошо шокшо лиеш.
  (Шернур район Шунсола)
• Турня вашке толеш – шошо эр лиеш.
  (Медведево район Арбан)
  
• Шошым кайыккомбо деч ондакрак турня толеш (турня «аршын келгытыш мландым коштем» манеш) – шошо ояр лиеш, турня деч ончыч кайыккомбо толеш – йӱран лиеш.
  (Пошкырт кундем Нуриман район Пелий ял)
• Толмекыже, кайык лудо тӱшка тӱрлӧ могырыш чоҥештылеш – шошо юалге да кужу лиеш.
  (Советский район Ошмаэҥер)
• Коля пыжашым шыжым мланде деч кӱшан опта гын, шошо шуйнышо лиеш, ӱлан – писын эртыше.
  (Медведево район Шеклянур)
• Мӱкш эр чоҥештылаш тӱҥалеш — шошо шокшо лиеш.
  (Медведево район Устье Кундыш)
  Анатолий Ивановын фотожо-влак.