ШОНЫМАШ УЛО ГЫН, ТУДЫМ ИЛЫШЫШ ШЫҤДАРЫМАН!
Южо самырык ешын кыртмен пашам ыштымыштым, эре уым шонен мумыштым, илыш дене тӧр ошкылмыштым ончен ӧрат. Лач тыгай койышан Шернур район гыч Алгаевмыт еш.
Ольга ден Пётрын Шернур посёлкышто кевытышт уло. Тыгак пайремлан иктаж пӧлемым шар дене сӧрастарен пуэн кертыт. А шукын нуным Вконтаксе соцсеть гоч тÿрлӧ лотерейым эртарымышт дене палат. Меат тендам нунын дене палымым ышташ вашкена.
− Кевытым почаш шонымаш кузе шочын?
− Кевытым почаш пелашем шукертак шонен коштын. Тунам тудо эше Моско олаш пашаш кудалыштын. Икана газетыште соцконтракт дене пайдаланен, шке бизнесым почмо нерген материалым ужын. Петянат кумылжо лектын. Тыге тудо кÿлеш документым ямдылен, бизнес-планым возен, йодмашым колтен.
Ончыч ме модышым ужалыше кевытым почаш шоненна, но пытартыш татыште чыла вашталтен, нӧшмым ужалыше «Семена» кевытым почна. Ты алан мыланна палыме: ача-авана шукертак кушкылым, нӧшмым ужалат, меат пашам палена. Адакшым иктаж йодыш лектеш гын, нуно мыланна ой-каҥашышт дене полшен кертыт.
2021 ий октябрьыште ме соцконакт дене пайдаланен, оксам нална. Вигак сатум, кÿлеш арверым да кевытлан пӧлемым кычалаш тÿҥалынна. А тылзе гыч, 7 ноябрьыште, изирак, но шкенан кевытнам почна, − палдара Ольга.
− Кеч-могай у пашам тÿҥалаш неле. А те ты пагытым кузе илен эртаренда?
− Чынак, нимо уке гыч тÿҥалаш куштылго огыл. Мыланна кугу шÿкалтышым кугыжаныш деч полыш ыштен. Туге гынат мемнан сатуна «сезонный», сендене калыкат лач посна пагытыште веле кевытыш коштеш. Эшежым шукын интернет йӧн дене пайдаланен сатум наледат. Чыла тидым шотыш налын, тÿрлӧ йӧным кычалына. Мутлан, кеҥежым емыж-саскам ужалена, а вашке у ийлан ямдылалташ тÿҥалына. Кожым, кожмодышым, сӧрастарыш-влакым ужмалмашке луктына.
Тылеч посна пелашем 2024 ий октябрь тылзышто Москошто аэродизайнерлан тунем лектын. Сандене йодмо почеш шарым овартена, кÿлеш гын пӧлемымат сӧрастарена.
− Конкурс-влакым кузе эртареда? Тылзылан иктым але коктым эртарыман манын планда уло?
− Тыгай «модышым» эртараш шонымаш вучыдымын ушыш толын пурен. Вет тиде чынжак шкешотан модыш, шукынжо ик гана огыл пӧлекым сеҥен налыныт. Туге гынат кажне гана гаяк ушнат.
Шарнем, икымше гана пÿчым модылтенна. Билет-влакым кÿчык жапыште налын пытареныт. Тыге умбакыжат тиде йÿлам шуена. Лач пӧлеклан темлыме сатуна гына идалыкын пагытшылан келыштаралтеш.
Мемнан посна план уке. Ончыч кечеш лу розыгрышымат эртаренна. Кызыт изиш жапна шагалрак.
− Южо еҥ шке планжым ойлаш огеш тошт. Туге гынат йодде ом керт. Могай шонымаш ончыкылыклан?
− Умбакыже эше кыртмен пашам ышташ. Кевытна вияҥже манын тыршаш тÿҥалына. Тыгак вес районлаштат шке кевытым почаш шонымаш уло.
− Тек умбакыжат чолгалыкда кушкын, пашада вораҥын толеш. А ме уло кумылын эскераш тÿҥалына.
