Пеледыш пеледеш йырваш! Могай чевер кеҥеж игече! (почеламут аршаш)

Вера Гордеева

Пеледыш пайрем
Пеледыш пайрем! Пеледыш пайрем!
Чодыраште, пасушто йоҥга сылне сем.
Киндан тек лиеш шем рокан мландына.
Кечан тек лиеш вуй ӱмбал кавана.

Чиен ош вургемым куэр лойгалтеш.
Марий тувыран куштымашла коеш.
А шӱшпыкын семже шокта гармоньла.
Толешыс пеледыш лӱман пайремна.

Ага тылзе шерын лектеш мландынам.
Шурнаҥше пасу кошартен шке пашам.
Тек кажне марий каналта пайремеш.
Марий сем почеш нойышо чон паремеш.

Улат тый йоча, я илалше коча.
Садак кече лекмым чонетше вуча.
Тек порылык лийже мемнан йолташна.
Келшен илымаште мемнан ю вийна.

 

Галина Соколова

Пеледыш пайрем дене!

Кандалге теҥыз гай каваш
Волгалт кӱзен адак у кече.
Пеледыш пеледеш йырваш!
Могай чевер кеҥеж игече!

Пеледыш лийже мыланем,
Пеледыш лийже тыланет!
Пеледыш дене, калыкем!
Эрталже сылнын пайремет!

Йонгалтше ныжыл семже тек!
Нӧлталтше тыйын кумылет!
Моторын чий, уремыш лек!
Тый кушто, муро, йолташем!

Жап писын, имне гай, йорта,
Но тый, Пеледыш, от мондалт!
Эше кеч шӱдӧ ий эрта,
А тый тӱзлане, пеледалт!

Светлана Алексеева

Шошо ага – тургым жап – мучашлалтын.

Иквереш погынен калык рӱж каналта.

Чапле йӱла: кид кучен, таҥтошкалын,

Пеледыш пайремым ий еда тарвата.

 

Шокшо салам, тыланет шочмо калык,

Пеледышла сылнын пеледаш тыланем.

Шолын ила вӱрыштет лыҥ усталык,

Марий койышетым ончен куанет.

 

Илашлан налат пӱртӱс деч куатым,

Надыретым алмашлан пуэнак шогет.

Эре ончыко кай, пален шкендын акым,

Йырет ешаралтше икоян йолташет.

Инесса Ардаш

Пеледыш пайрем

Пеледыш пайрем — сӧрале пайрем!

Моторештын, уэм, калыкет куандаре!

Пеледыш пайрем, шӱдӧ ийым темен,

Пеледыш аршашым кучен, ончык кае!

 

Пеледыш пайрем — пӱртӱс ылыжмаш!

Йырым-ваш пеш мотор, сылне, лайык!

Пеледыш пайрем — пеледше мландем,

марий кундемем, тый саем да тӱзлане!

 

Пеледыш пайрем, икте-весым ушен,

Ваш келшен, сай илаш кумылаҥде!

Мурымаш-куштымаш дене сылнештарен,

Тый Марий кундемнам чапландаре!

Нина Щербакова

Пеледыш пайрем

Чевер марий тувыр-шовыр —

Ший аршаш йолген.

Шонанпыл гай мотор шовыч

Кумылна кӱзен.

Пайрем мемнан таче лачак,

Рӱжге мурена.

Пошкудо, тулаче, каче

Лекса, куштена.

 

Пеледеш йырваш пеледыш —

Пеледыш пайрем!

Сирень, ломбо тамле ӱпшым

Тый денет пайлем.

Шошо ага паша пытыш,

Мурен куштена.

Шокталта гармоньчо — ончо

Капкыл лывырга.

 

Мландывалне тыныс лийже

Лийже чылалан.

Сылнештеш пӱртӱсшӧ , тӱсшӧ

Иланат чонан…

Патыр марий тукым, чулым

Улына виян!

Сылне вершӧрнажым керын

Чот, аралыман!