Каена ме тунемаш! (почеламут-влак)
Ты почеламут аршаш икымше классыш тунемаш кайыше йоча-влаклан, тыгак туныктышо, ача-ава-шамычлан пӧлеклалтеш. У тунемме ий тӱҥалме пайремыште икшыве-влак почеламутым марла лудын кертыт!
***
Эрдене эр изи йоча
Школыш толын тӱкалта:
— Комдык почса омсадам,
Тунемаш мый толынам!
***
Таче школышко каем.
Сай салам, пӱртӱс, урем.
Шуко уло вет буква,
Шочо первый мут – «Ава».
***
Ямде мыйын чылажат:
У тетрадь да ручкажат.
Уло чапле формемат,
Неле огыл сумкамат.
***
Пыштена сумкаш книгам,
У тетрадьым да ручкам.
Она улыс падыраш,
Каена ме тунемаш.
***
Изи манын ида ойло,
Меат школыш каена.
Чыла дечын сай отметкым
Ынде поген налына.
***
Адакат сентябрь шуын,
Таче школыш каена.
Сай тунемын, шуко лудын,
Шинчымашым погена.
***
Лӱдын-вожыл итак шого,
Кажне кечын ушым пого.
Тый ит волто шке лӱмет,
Кӱшнӧ лийже школ чапет.
***
Таче школыш каена,
Визытаным налына.
Тек мемнан нерген ойлат:
«Первый класс – чылан палат!»
Таче школыш!
Икымше гана
Ошкылалын колтена.
Таче школыш!
Эн изи уна –
Ученик ме лийына.
***
Возаш, лудаш тунемнена –
Ме школыш толынна.
Буква ден цифрым палена,
Тунемше улына.
Ме парт коклашке шинчына
Ик классыште, пырля.
Доска воктене школ ава –
У туныктышына.
***
Кеҥеж гочак вучем,
Эше мыняре кодын.
Ручкам шинчем кучен,
Книгам, тетрадьым йодын.
А таче почмо школыш,
Пурем пеш куанен.
Авам чияшем полшыш,
Рюкзакым тупышкем.
***
Ошкылам мый школыш,
Кидыштем аршаш.
Йолташемже ойлыш:
«Чылажат пеш раш!
Эрденак кынелын,
Школыш мый каем.
Тунемам тыршалын,
«Пятьым» вел налнем.
Туныктышын лӱмжым,
Кузерак шарнаш.
Ынде тудо тӱҥжым,
Тӱҥалеш ойлаш!»
Туныктышемлан
Изи улам, манат?
Ушем поян садак!
Мый тунемаш коштам,
Отметкымат налам.
Школна мемнан поян:
Компьютер, книгалан.
А тӱҥжӧ – икоян
Школна поян ешлан.
Туныктышем – ава,
Ме улына — йоча.
Келшенак илена,
Ушнам пойдарена.
Кокланже шоналтем:
«Кушеч чыла палем?»
Перна трук вуйышкем:
Пуа — туныктышем.
Уш-акылым? – Пуа!
Кӱлеш – умылтара.
Шотлаш, возаш полша –
Корнем волгалтара.
Пуа шыҥдаренак
Ӱшаным эрлалан.
Ушемым пойдара,
Эре куандара.
Мый «таум» ойлынем,
Вуем тудлан савем.
Тунемме йолгорнем
Тыршен умбак таптем.
«Лач тунеммек лият,
Чыла дечат виян».
Пыштем мый ушышкем
Оет, туныктышем!
Людмила Семёнова
***
Кидыштем мотор аршаш,
Сумкаштем у карандаш,
Ынде тунемаш каем,
Вучо школ гыч, курчакем.
Авам налын шем катам,
Сур костюмым да сумкам,
Куанен шерем ок тем,
Школыш наҥгая корнем.
Нина Щербакова:
***
Мые школышко каем,
Куаналын, тӧршталтен.
Визытанлан тунемаш
Тӱҥалам мый чот тыршаш.
***
Ош тасмам авам пуэн,
Ӱпым тыманмеш пунем.
Таче йыҥгыр мыланна,
Школышто пайрем лӱшка.
Чылажат икымше
Школыш икымше гана
Почылтеш мылам омса.
Оҥгыр икымше йоҥга,
Йӱкшӧ шӱлык деч посна.
Шыргыж, шокшын вашлиеш,
Чыланнам уша иктеш,
Мутшо чонышко иеш,
Тидыже – туныктышем!
Класс кумда, доска, парт-влак,
У букварь – ончен ӧрат!
Сайын пеш умылтарат –
Тунемде кузе кертат?!
Ална Алкече
Сентябрь тылзе толын.
Жап тунемаш каяш.
Изи ньога мый омыл.
Буквам кӱлеш палаш.
Буквам вел огыл,тӱрлым:
Лудаш,возаш,ушаш…
Да чын Айдеме лӱмым
Кӱлеш сулен налаш.