Пӱртӱслан тауштен, порым йодын…
Таче, 3 ноябрьыште, Марий кундемыштына икмыняр вере кумалтыш-влак эртаралтыныт: У Торъял район Токтарсола Саваран отышто Тӱня кумалтыш, Советский район Кундышӱмбалне кумалтыш, Марий Турек район Арбор кундемыште кумалтыш.
Советский район Кундышӱмбал отышто вич ий ончыч кугу Тӱня кумалтыш лийын. Теният верысе калык вич тулолмо дене кумалын.
Еҥ-влак кӱсотыш кайыквусо, кинде-шинчал дене миеныт, надырымат пыштеныт. Кӱчан вольыкым (шорыкым) налаш ял калык ончылгоч шийвундым поген.
Кумалтыш ласкан, икоян эртен кайыш. Тӱҥ Юмылан, Курык кугызалан, Мер Юмылан, Шочынавалан, Мланде Авалан кумалаш толшо еҥ-влак, пӱртӱслан тауштен, мӧҥгышт поро кумыл дене пӧртылыныт.
