Оҥгыр йӱк – 2023
16 декабрьыште Пошкырт кундем Мишкан селасе Историй да тӱвыра рӱдерыште «Оҥгыр йӱк» йоча муро фестиваль эртен. Конкурс кумшо гана эртаралте, но тений тудо республикысе кӱкшытан лийын.
Йоча муро конкурс марий калык мурым, марий семмастар-влакын саскаштым калыклан ончыкташ манын, тыгак йоча-влакым калык тӱвыралан шӱмаҥдаш да усталыкыштым изинек вияҥдаш манын эртаралтеш.
«Оҥгыр йӱк» тений Илиш, Балтач, Мишкан районла гыч 19 йочам поген. Жюри икшыве-влакын мурымо мастарлыкыштым кок тӱшка дене аклен: 7-10 ияш ден 11-14 ияш-влак. Посна приз дене Марсель Тимирбаев, София Янсубаева палемдалтыныт. Изирак-влак коклаште икымше верым Дмитрий Янситов, кокымшо верым Арина Апекова да кумшо верым Алиса Алтынбаева налыныт. Кугурак-влак коклаште икымше вер дене Арина Иманова, кокымшо дене Вероника Исеметова да кумшо дене Дарья Валтиева палемдалтыныт. Конкурсын Гран-прижым Мишкан район Кугу Соказа гыч Милена Апековалан кучыктеныт.
Арсений Андреев, жюри еҥ, автор да мурызо:
– Конкурс моткоч сай кӱкшытан лийын. Чыла шот да рат дене эртен. Йоча-влак мастарлыкышт дене пешак куандарышт, номер-влак сылне улыт ыле. Организатор-шамычлан жюри сомылым шукташ ӱшанымыштлан тауштем.
Конкурсын организаторжо-влак: – Башкортостан Республикысе Калак-влак келшымаш пӧртын филиалже — Марий историй да тӱвыра рӱдер да Мишкан селасе тӱвыра полат.
Автор: Алексей Ибулаев, Мишканысе
Марий историй да тӱвыра рӱдерын
тӱҥ специалистше.
Авторын фотожо.
