«Келшымаш кӱвар» пеҥгыде лийже!
Автор — Нина Щербакова.
Ме, «Келшымаш кӱвар» проектын участникше-влак, Марий Эл Республикысе тӱрлӧ лук гыч, тӱрлӧ район гыч улына. Усталык шӱлышан еҥ-шамычым чумырышо тиде группым почмыланна ынде кок ий лиеш. Людмила Юрьевна Градован шонен коштмо пашаже, шытен лекмеке, саскам пуаш тӱҥале. Людмила Кужэҥер район Агытансола ял гыч. 12 ий тӱвыра пашам шуктен шоген. Ынде ятыр жап Москош пашаш коштеш, туге гынат чонжо дене тӱвыра паша верч азаплана. Тыгай группым погаш Советский район «Кугезе кумыл» ансамбльым вуйлатыше Галина Александровна Щербакова дене мутланымыже да каҥашымыж деч вара кумылаҥын. «Творческий шӱлышан, усталык койышан шуко палымем уло. Тӱрлӧ мастарым ик ешыш поген, пырля ушымо шуэш», – манын тунам Людмила Градова.
Галина Александровна Щербаковам Марий Элыште сайын палат. Тудо «Кугезе кумыл» лӱман тале этно-фольклор ансамбльжым 22 ий вуйлата. Марий тӱвырам вияҥдыме пашалан кеч-кунамат мелын шога. Ты ганат тӱшка сомылыш ушнаш тореш лийын огыл.
Тунам нуно мый денем каҥашаш толыныт. Мыйжат Людмила Градова дене шукертак палыме улам. Москошто 18 ий иленам, Моско оласе Марий Тӱвыра Рӱдерыш Людмила дене пырляк коштынна.
Тыге мыят «Келшымаш кӱвар» проектын участникше лийым. Муро-влаклан мутым, семым келыштараш полшышым. Тӱшкашкына икте почеш весе ушнышт: Советский, Шнаран (Чкарино), Шернур, Йӱледӱр, Шолэҥер, Шӱвылак да Йошкар-Оласе тӱвыра пӧртлаште тыршыше еҥ-влак. Пашам виктарымаште Люлмила Градова вуйын шога, тудлан чыла шотыштат Галина Щербакова полша. Тыге ме изи тӱшка гыч кугу группыш савырнышна.
Ме марий калыкын йӱлажым илышыш пуртена, самырык тукымлан пример лияш манын, шке мастарлыкнам тӱрлӧ тӱвыра пӧртыштӧ ончыктена. Марий кугезе муро-влакым, куштымашым, марий вургемым, койышым кугезына-влак деч мыняр шарнен кодынна, тугак ончыкташ тыршена. Кызытсе саман дене келшыше мурына-влакат шагал огытыл, почеламутымат сцене гыч йоҥгалтарена. Кажне район шке тӱвыра пӧртышкыжӧ ӱжеш, ваш-ваш полшен, концертым чумыраш тыршена. Людмила Градова шкеж гаяк икгай шинчаончалтышан, икгай усталык шӱлышан еҥ-влакым шке йырже поген, а ме, «Келшымаш кӱвар» проектын участникше-влак, тудын дене пырля мастарлыкнам калык ончыко луктына. Кызыт ынде икгаяк тӧр шогышо, чонна дене ик семын чолгыжшо, ваш-ваш пагалыше да аклыше коллективыш савырненна. Ынде «Мемнан» да «Ме пырляште» манын кертына. Шкенан гимн мурына шочын, тудо «Ме марий улына» маналтеш. Сандене мемнам Марий Элын тӱрлӧ верыштыже ужаш лиеш: теве ме Советскийыште, теве Кужэҥерыште я У Торъялыште, теве Йошкар-Олаште улына…
Мый «Келшымаш кӱвар» проектын участницыже улмем дене моткоч кугешнем, тысе йолташем-влакым аклем да тиде куандарыше кылым умбакыжат кучаш тӱҥалам, шонем. Вет мыят тӱвыра пӧртыштӧ пашам ыштем, чонем калыкнан тӱвыражым вияҥдыме верч йӱла, мыят шке ял калыкемлан марий йӱлам да ыштыш-кучышым палдарен шогем да умбакыжат тыршаш тӱҥалам.
