Мишкан кундемын эн моторжо
Тыгай конкурс Пошкырт кундем Мишкан кундемыште ий еда эртаралтеш. Ик ийын тушто марий ӱдыр-влак шке мастарлыкыштым ончыктат, вес ийын – татар ӱдыр-шамыч, а кумшо ийын конкурс тӱрлӧ калык гыч лекше ӱдыръеҥ-влакым пырляшке чумыра. Тений «Мишканын миссше-2022» лач тыгай лийын.
Конкурс 11 мартыште Мишканысе историй да тӱвыра рӱдерыште эртаралтын. Индеш ӱдыр коклаште ныл Чачавийже – марий калыкын шочшыжо.
Конкурс годым ӱдыр-шамыч усталыкыштым, уш-акыл пӱсылыкыштым тергеныт, моторлыкыштым да мастарлыкыштым ончыктеныт. Ончылгоч пуымо мӧҥгӧ пашам Интернетысе воткыл лаштыкеш вераҥдаш кӱлын. Тушто ӱдыр-влак ик кечыштым кузе эртарымым ончыктеныт.
Иктешлымаш почеш, «Мисс Очарование» лӱмым Кристина Айгузина сулен, «Мисс Оригинальность» лӱмым – Альбина Мурадымова, «Мисс зрительских симпатий» лӱм Наталья Наничкиналан пуалтын, «Мисс загадочность» — Дарья Хамитовалан, а «Мисс Романтичность» – Сандра Шамаевалан. Кумшо верым Резеда Сафиуллина налын, кокымшым — Лилия Гиниятуллина, Гран-прим — Ляйсан Иксанова. Икымше вер дене марий ӱдыр, Кугу Соказа тӱвыра пӧртын пашаеҥже, Анастасия Апекова палемдалтын. Саламлена!
