«Чын» але «шоя» кова-влак

Одо кундемысе Бураново селасе «ковай-влак» Йошкар-Олан 440-ше лӱмгечыжлан пӧлеклалтше пайремым сӧрастарыме нерген уверым ужмеке, вигак нунын деке экскурсий дене мийымым шарналтышым.

2014 ийыште икымше курсым тунем пытарымеке, мыйым да эше икмыняр студентым Ижевск олаш финн йылме курсыш колтеныт. Йылмым тунемме деч посна ме тыгак верысе калыкын тӱвыраже да йӱлаже дене палыме лийынна. Каныш кечылаште кугу автобусыш шинчын, Одо кундемын тӱрлӧ районлашкыже экскурсий дене лектын коштмо. Ик кечын лачак Бураново селаш кудалме.

Молан лач тушко? Шукын шарнат очыни, 2012 ийыште «Бурановские бабушки» коллектив «Party For Everybody» муро дене Евровиденийыште кокымшо вер дене палемдалтын. Сандене тыгай палыме еҥ-влак дене мемнамат палымым ышташ наҥгаеныт.

Кова-влак чапле у клубышто вашлийыч. Коллективын «шочмыжо», вияҥ толмо корныж нерген палдареныт. Лекше йодыш-влакланат вашмутым пуэныт. Туштак изирак тоштерыштым ончен савырненна. А вара мыланна изирак концертым ончыктеныт. Тыгак кажне мийышылан изирак пӧлекым кучыктеныт. Тӱшка фотом ыштымеке, ме умбакыже кудалынна. Чаманен каласыман эре шыргыжше, изирак капан ковай — Наталья Пугачева вашлиймашыш миен кертын огыл. А шукынжо тудым поснак чот йӧратеныт.

А вес гана 2018 ийыште Шем теҥыз воктене, «Таврида» форумышто лийме годым «Бурановские бабушки» толыт манын увертареныт. Эх, могай куаненам! Но арам. Вашлиймашке йӧршын вес коллектив миен. Вара веле пален налынам, ончычсо коллективым кораҥденыт да лӱмыштымат кучылташ чареныт. Туге гынат «чын» ковай-влак вуйыштым огыт саке, «Бабушки из Бураново» лӱм дене умбакыже калыкым куандарат.

Ынде лач ик йодыш гына: «чын» але «шоя» кова-влак олан пайремышкыже толыт.