Межым почкымаш

Теле пагыт кидпаша тургымым конда. Тыге лийын ожнысек. Поснак ÿдырамаш-влак кужун шуйнышо касым тÿрлö сомылым ыштен эртареныт: межым шерыныт, кÿнчылам шÿдыреныт, пидыныт, тÿрленыт. Кызыт тыгай сÿрет утларакше эртыше пагытын ик сылне ужашыже семын ушешна кодеш. Но у саманыште ожнысо илыш-йÿлам шуктышо-влак уке улыт манаш ок лий. Мутлан, кызыт шорыкым яллаште, шагалын гынат, но ончат. Меж дене кылдалтше пашамат ончычсо семынак ыштен шогышо-шамыч улыт. Тидыжым ме Волжский район Памар селаште верланыше межвакшыш мийыме годым пален нална.

Межвакшын шке ойыртемалтше ямже шижалтеш. Тушто улмо годым пуйто эртыше курымыш логалат. Еҥ-влак икте-весе дене порын пелештен колтат, шыргыжалыт, ваш-ваш полышкалат. Ик ора меж почеш вес ора-влак мамыкыш савырнат. Шеме, ошо… А кок тÿсге кышкет гын, сур тÿсан меж лектеш. Межым кышкыме годым мут почеш мут велеш, кажне шкеж нерген каласкала, илыш нерген шонкала.

Пале-влак:

• Шошым шорыкым тичмаш тылзе годым тÿредман. Тунам меж вужгата да кужу лиеш. Шыжым – кушшо тылзе годым.
• Кидпашам шуматкечын тÿҥалаш ок лий – ок ушно.