Ярминга ушен
Наталия Ильминован пашаже-влакым ужмеке, «Унагудо» интернет-журналын лаштыкыштыже тудын нерген материал лийшаш манын вигак умылышым.
А олан кечыжлан пӧлеклалтше ярмингаште тудын дене лийше историйым пален налмеке, ты шонымашыш шуашак тыршенам. Сандене таче тудын дене материалым лудаш темлем.
— Мый марий улам, но чаманен каласем, шочмо йылмем дене мутланен ом мошто. Туге гынат марий чонан улмем палем, шижам. Калыкнан тÿвыраже, йÿлаже мыланем моткоч шерге. Моштымем, кертмем семын марий улмем ончыкташ тыршем.
Калык йÿла тематике студент пагытыштак чонеш возын. Мый «Ландшафтный дизайнер» направлений дене шинчымашым погенам. Курсовой пашам возымо годым туныктышем марий калык тематикым кучылташ темлен. Тыге мый школысо ик лукым (рекреацийым) шонымем семын келыштаренам. Умбакыже тиде «марий шÿлыш» эре пеленам лийын.
2012 ийыште Ираида Степанован марий тÿр нерген книгажлан эҥертен, марий сӧрастарыш-влакым ямдылаш тÿҥалынам. Варарак блокнот-шамычым ыштылынам.
А тений уэш марий тÿр деке пӧртылынам. Тидлан ятыр книгам, материалым шымлен лектынам. Шинчмашем ынде поянрак, умбакыже тыршаш кумылемат шукырак,- палдарыш кидмастар Наталья.
Кузе палемденна ыле, Наталья кандашымше августышто, олан шочмо кечыжлан пӧлеклалтше ярмингаште Чавайн лÿмеш бульварыште шке пашаже-влакым ужален.
Тушто лийше ик историйым кидмастар мыланнат каласкалыш:
— Ярмингаш ушнаш кап-кылат пенгыде лийшаш. Мыйын блокнотем-влак куштылгыжак огытыл, сандене икмыняр гана неле яшлыклан машина деке кошташ перныш. Тыге пытартыш гана пӧртылмем годым шарен оптымо сату-ÿстелем воктене палыме сÿретче Иван Ямбердовым ужым. Тудо тыглай гына ончен огеш шого, а шымла, кидешыже блокнотым пÿтыркала. Каласаш кÿлеш Иван Михайлович мыйын йӧратыме сÿретчем. Тудын пашаже-влак мыланем поснак Ю шÿлышанла чучыт.
Кодшо ийын Пеледыш пайрем годым тудын книгажым налынам, а автор тораште огыл шоген гынат, автографым йодаш аптыраненам. Тыгак телым Иван Ямбердов дене вашлиймашыш миен коштынам. Адак лишемаш ӧрым. Сандене тудым ÿстелем воктене ужмеке, шижмашем могайрак лийын умыледа, шонем.
Мутланымеке, мый сÿретчылан блокнетем пӧлекленам, а вашеш тудо мыйын портретем возен пуэн. Варарак уэш пӧртылын, «Око Земли» сÿретшым конден кучыктыш да эше ик блокнотым нале.
«Ниможат тыл илышыште тыглай огеш лий, пурымаш маншет уло», манын суретче дене воштылалтна.
Тиде кече поснак событий семын шарнымашеш кодеш! Вет мый тиде ярмингаш ушнымем дене пагалыме сÿретчем дене вашлийынам. Поснак палемдем — Иван Михайловичын пашам-влаклан акым пуымыжо чонлан чот шерге ак.
🟡Книга, сÿрет, вашлиймаш, блокнот.. Чынжымат ты историйын пуйто ала-могай Юзо вийже уло. Уке-уке, осал шонымашан огыл, а ший мундырала. Кеч-мыняр пÿтыркалет гынат, мучаш садак икте!
