Марий шӱлышан йочасадыште…
Марий чиеман еҥым ужмеке, кеч-кунамат кумыл нӧлтеш. А йоча-шамыч тыгай вургем дене изи пеледышым ушештарат. Сандене Йошкар-Оласе «Изи Патыр» йочасадыш мийымеке, чылт пеледышан йомак тӱняш логалмыла чучо. Кеч-могай унам вашлийме годым тыште икшыве-шамычат, воспитатель-влакат марий вургемым чият да уна-влаклан мастарлыкыштым ончыктат.
Ты ганат йоча-влак тӱрлӧ марий калык йомак нерген каласкалышт, марла муралтышт, кушталтенат пуышт, почеламутым лудыч. Кажне йоча марла чаткан да куштылгын мутланен ок мошто гынат, тыште марий йылмын сылнылыкшым кажне икшывылан шижаш туныктат. Занятийлаште воспитатель-влак калыкнан илыш-йӱлаже, тӱвыраже нерген шинчымашым пуат, тӱрлӧ модыш, кидпаша гоч чонышкышт марий шӱлышым шыҥдарат.
Ольга Валерьевна Казанцева, воспитатель:
– Ме йоча-шамычым марий шӱлышеш кушташ тыршена. Тӱрлӧ конкурсыш коштына, почеламутым марла лудына, мурена, куштена. Марий сынан мероприятий-влакым шкеат эртарена. Ача-ава-влакат кумылаҥыт. Руш, татар икшыве-шамычат марла ойлаш тунемыт. Тидыже кумылым нӧлта, шулдырым пуа. Йоча-влакын тыршымыштым ужын, марий йылмына ила, йӱлана аралалтеш манын, моткоч йывыртена.
«Изи Патыр» йочасадым почмылан вашке кок ият шуэш. Марла йоҥгалтше ты йочасадыш таче кечын кумыт гыч шым ияш марте 390 икшыве коштеш, 13 группо пашам ышта, 17 воспитатель тырша.
Снежана Никитина, воспитатель:
– Мый кандаш ий дошкольный педагоглан пашам ыштем. Шукын йодыт: «Молан лач йочасадыште пашам ыштет?» А мый тыгерак вашештем: «Эргымым йочасадыш колташ ямдылалтмекем, уверым кольым: Медведево посёлкысо 4-ше номеран йочасадыш марий йылмым туныктышо кӱлеш. Ятыр жап шонкалымек, тушто марий кугыжаныш йылмым туныкташ тӱҥальым. Йоча-влаклан ятыр занятийым, мероприятийым марла эртараш логалын. Икшыве ден ача-ава-влак тореш лийын огытыл. Шке мастарлыкыштым конкурслаштат, утренниклаштат ончыктеныт.
Жап эртымеке, вес вере илаш куснышна. Тыге мый Йошкар-Оласе 53-шо номеран йочасадыш пашаш тольым. «Спортики» группын воспитательже улам. Йочасадыште илыш шолеш: занятий, конкурс, утренник… Икманаш, шӱлалташ жап уке. Туге гынат пашам тыршен ыштена. Йоча-влаклан уло палымынам пуаш тыршена, тыге гына паша лектышан лиеш.
Йочам йӧратыше, пагалыше айдеме гына йочасадыште тыршен кертеш. Мый умбакыжат тыштак пашам ышташ шонем. У кӱкшытыш шуаш тыршаш тӱҥалам.
Ӱшанена, марий лӱман йочасадыште шукталтше пашан лектышыже эре тӱвыргӧ лиеш. Вет нӧргӧ айдемын чоныштыжо марий калыкын тӱвыра поянлыкшым шижын моштымо, пагалыме кумыл илана гын, у тукымна йылмынам, йӱланам, калыкнам пагалыше кушкеш. Тидыже – ончыкылыклан волгыдо ӱшан.
