Кугешнаш таратыше еш

Татьяна ден Николай Козловмыт Оршанке районысо Кугу Ӧрша ялыште илат. Ешыштышт кум икшыве кушкеш.

Марий шӱлышан ты ешым ончен куанет, чонышто кугешнымаш кумыл шочеш. Татьяна ден Николай кум икшывыштлан сай шинчымашым пуаш тыршат, кажныжлан жапым ойырен моштат.
— Коля пелашем «Инфотех» лицейыште туныкта. Кугурак ӱдырна Кугу Ӧрша школысо лумшо классыште шинчымашын пога. Ме тудын дене кугешнена: Софья сайын тунемеш, яра жапыште книгам лудеш, гитар дене шокта, тӱрлӧ курсышто уш-акылжым пойдара. Эргына Оршанке школышто тунемеш. Урок деч вара Йошкар-Олаш, футбол дене тренировкыш кудалыштеш. Тудо ынде визымше ий Олимпийский резервын спорт школыштыжо шуаралтеш. Мый Кугу Ӧрша школышто тӱналтыш класслаште туныктышылан пашам ыштем. Изи ӱдырна школ пеленысе йочасадыш коштеш.
Ешыштына марий шӱлышым арален кодаш тыршена: марла мутланена, марий передачым ончена, марий книгам да газетым лудына. Машина дене кудалме годым марий радиом колыштына.
Изи ӱдыремлан компьютер полшымо дене кӱчык видеоролик-влакым ыштем: янлык-влак, вольык, пакча-саска нерген палдарем, — каласыш Татьяна.