Марий калыкым йӧратымаш вургем гыч тӱҥалеш

31 октябрь гыч 2 ноябрь марте Йошкар-Олаште XII Марий калык погын эрташ тӱҥалеш. Марий Эл да марий-влакын тӱшкан илыме вес кундемла гыч ты погыныш 400 утла делегат толшаш. Лишыл кечылаште ме тендам икмыняр делегат дене палдарена.

Палыме лийза! Пошкырт кундемын делегатше — Лариса Ахметова:

— Мый Пошкырт кундем Нефтекамск олаште илем, йочасадыште пашам ыштем.
Пошкырт делегаций дене Йошкар-Олашке икымше гана каем. Марий кундемын рӱдолажын моторлыкшым, тӱвыражым ончалнем.
Марий Погынышто йоча-влакым йочасад гычак марий йылмылан туныктымо нерген йодышым рашемдынем. Икшыве-влак изинекак шочмо йылмыштым, тукымвожыштым палышт. Тыгак йочасадыште тӱрлаш туныктымо кружокым почаш шонымаш уло. Тыгай сынан кружок-влакат лийышт.
Погынышто вес делегат-влак дене палыме лийнем, вес ганат вашла мутланаш, конференцийлаш кошташ, тӱрлӧ йодышым каҥашаш йӧн лийже. Марий калыкна тӱняште курымешлан лийже, вожшо пеҥгыдемже. Калыкна виян, мый тудым моткоч йӧратем. Мотор вургемнат ынже йом, тек еҥ-влак тудым чӱчкыдынрак чият. Мый шкеже марий тувырым чиемат, каплан копыж-ж чучеш. Тыге мый тукым вожемым, шке калыкемым шижам.