Лийже тыныс кава вуй ӱмбалне

Морко район Унчо кундемысе Шлань ялын эргыже, милицийын отставкысе подполковникше Талгат Камильевич Мухамадеев элым аралыме пашалан 25 ийым пуэн. 1990-ше ийла тӱҥалтыш гыч 2000-ше ийла марте ОМОНышто тыршен. Тиде жапыште Талгат Камильевичым «Патырлык» орден, 2-шо степенян «За заслуги перед Отечеством», «За отличие в охране общественного порядка» медаль-влак дене наградитленыт.

— 1995 ий гыч тӱҥалын иктаж 15 гана командировкылаш миенам. Кызыт вахте дене пашам ышташ Йӱдвелыш каят, а ме Чечняш коштынна. Эн ондак Москошто – путч, вара – Дагестан. Осетино-Ингушский конфликт годым осетин ден ингуш-влакым лыпландаренна…

Тиде пайрем дене пӧръеҥ-влакым саламлем! Таза, пиалан, кужу ӱмыран лияш тыланем.
Ончыкылык салтак-влаклан тыгай тыланымашем лиеш: ешдам, шочмо мландыдам аралаш кӱлеш, садлан тидлан изинек ямдылалтман. Лӱдаш огеш кӱл. Пӧръеҥ шочынат гын, пӧръеҥ улметым ончыктыман, чодыраш шылын куржман огыл.
Вуй ӱмбалнына эре тыныс кава лийже! Пайрем дене! — манеш Т.Мухамадеев.

Талгат Камильевичым меат шокшын саламлена да сай тазалыкым, вий-куатым, чон ласкалыкым тыланена.

И.Речкинын фотожо