«ЛАРИМАРИ» РОССИЙ МУЧКО УЖЫН КОШТЕШ. ТЕНДАМАТ ПЫРЛЯ ӰЖЕШ!

Телевизор я интернетыште путешественник-влак нерген шуко программым, блогым муаш лиеш. Но «Путешествие марийки по России» блог/тÿшка мыланем поснак лишыл да шергын чучеш. Тÿҥ амалже –блогым вÿдышӧ Лариса Арламова дене вашла палыме улына, а эше тудо марий ÿдырамаш!

Лариса Владимировнан кажне постшым лудмеке, ола, тушто илыше калык нерген утларак пален налме шуэш, иктаж гана миен толаш шонымаш шочеш. А йÿла дене кылдалтше материалже поснак лишылла чучеш. Теве Улан-Удэ ола гыч калык кочкыш нерген постым ужымат, шӱвылвӱдемак нелын колтышым…

Могай поян мемнан Российна тӱрлӧ калыклан, а калыкше шке тӱвыраж дене виян! Тидым ужын, шижын да аклен гына моштыман!

«Путешествие марийки по России» блог лач тиде темым авалта.

Теве шукерте огыл «ЛариМари» черетан путешествийыш лектын коштын – Йошкар-Олаш толын-каен, тылеч ончыч, октябрь тылзыште Вологда олаште уна лийын. А кушеч «ЛариМари» шке корныжым тÿҥалын, кумданрак пален налме шуэш. Тидын нерген Ленинград областьысе марий-влакын «Ший корно» автономий ушемым вуйлатыше Лариса Арламова деч пален налына.

– Кок ий ончыч «Транссиб»¹ дене маршрутым чоҥенам, могай олалаште «шогалаш» шонымем картыште палемденам. А вара элна мучко тыглай гына кудалышташ огыл манын, «шогалме» верлаште марий-влак дене вашлияш шонен пыштенам.

Тидлан верысе Келшымаш пӧртлаш возенам, палыме блогер-шамыч деч полышым йодынам. Южо вере чынак кугу полышым ыштеныт. Мутлан, Красноярск олаште марий-влак дене вашлийынна. Телеэфирыш «Утро на Енисее» программыш войзалташ тусо марий-влак дене миен толынна. Йоҥылыш ом лий гын ты вашлиймаш деч вара нуно ушемым чумыреныт. Тыгак чуваш ӱдыр дене – Иркутскышто, казах ӱдыр дене Новосибирскыште ужынна. Но чыланжак мелын лийын огытыл. Владивостокышто «Марий йылме лагерь» ешын участникше Николай Саймурзанов дене вашлийынна. Тудо шкеже Новочебоксарск ола гыч улмаш, а тунам лач тудо кундемыште командировкышто лийын. Пӧръеҥ мыйын кушто улмем блог гоч эскерен, лудын да вашлиймашыш ӱжын.

Чаманен каласыман, тудо путешествий деч вара постым блогышто шагалрак луктам. Тиде ешартыш жап, вий кӱлыт. Туге гынат йӧршын ты сомылым кудалтен омыл, – палдарыш Лариса Владимировна.

Палемден кодынем. Лариса Владимировна «Транссиб» манме маршрут дене каяш шонымыжым чыла блогышто почын пуа: билетлан акым, корнышто лийме жапым, поездыште кӧ дене палыме лиймым, могай олалаште шогалмым – палдара.

– «Путешествие марийки по России» блогыштыда тӱҥ геройым – «ЛариМари»ужына. Кузе ты образ шочын?

– Транссиб дене корныш каяш лекмем деч ончыч ты пу курчакым мыланем Курыкмарий районышто Фаина Викторовна Эшмякова пӧлеклен (27 июль 2023 ий). Тыге ты курчак вигак тӱҥ геройыш савырен. Тӱрлӧ олалаште оҥай памятник але достопримечательность воктене тудым войзенам.

Каласен кодынем, блогын тӱҥ шонымашыже мыйын путешествий гыч тӱналын, вара марий-влак дене вашлиймашым туштак почын пуэнам. А ынде тӱрлӧ регионышто йылме лагерьыште вашлийына. Чылажат ик тичмаш сӱретыш погынен. Ме лагерьын участникше-влак дене ончылгоч верым палемдена да кенежым погынена, марий йылмым тунемына, верысе калык дене палыме лийына, йӱлаштым шымлена. Мо дене шкешотан путешествий огыл вара?

Чынак, вес кундемысе марий-влак дене палыме лияш, нунын илыме верышкышт миен-толаш моткоч сай амал. Мыят ты гана нунын деке ушнаш кумылаҥым.

Тыгак кугешнен палдарыме шуэш тений шыжым Лариса Владмировнам «Гордость нации» конкурсын округысо этапыштыже «За вклад в обеспечение гражданского единства и межнационального согаласия» номинацийыште палемденыт.

Тек умбакыжат тендана паша лектышда куандара! Шуктымо пашада тӱвыргӧ лектышан лийже!

«Транссиб»¹ (Транссибирская железнодорожная магистраль)