Купеч тоштер
А.В.Муравьёв лÿмеш купеч илыш-йÿла тоштер Козьмодемьянскысе тÿвыра да историй тоштер комплексыш пура. Тудо антрессолян, мезонинан да цокольный пачашан ожнысо купеч особнякыште верланен. Ты пöртым 1897 ийыште чоҥымо, тушто чодыра озанлыкым кучышо купеч А.И.Шишокин илен. 1899 ийыште купеч йождаралтын, тудын заводшо-влакым залог шотеш поген налыныт, а 1902 ийыште пöртым ужалаш луктыныт.
XX курым тÿҥалтыште особнякым чодыра озанлыкым кучышо купеч-влак Иван, Василий да Александр Губинмыт налыныт, контор-влакым почыныт.
1917 ийыште купеч пöртым кугыжаныш погыш кусареныт. Ончыч тыште РКП(б) уездный комитет лийын, вара ВЛКСМ комитет да «Ленинский путь» газет редакций пашам ыштеныт. Редакций вес вере куснымеке, ты пöртым илыме вер семын ужаленыт.
1995 ийыште тоштер-заповедникын директоржо, шанче да тÿвыра пашаеҥ А.В.Муравьёв (1936-2006), тыште мебель мастарлык тоштерым почын.
Тоштерын коллекцийжым тÿҥ шотышто Козьмодемьянскыште илыше калыкын пуымо арверже-влак гыч погымо: XIX курым мучаш – XX курым тÿҥалтыш жапысе илыш-йÿла дене кылдалтше ÿзгар, мебель, кÿмыж-совла, вургем да йолчием, тÿрлö документ, книга-влак, окса.
Фото-влакым тоштерын сайтше гыч налме:
http://www.kmkmuzey.ru/kupbit
