Кӱ курыкышто памаш вӱдат тамлырак…
Йошкар-Ола деч 100 меҥге тораште, Кужэҥер районышто, верланыше Кӱ курык кундемнан ик эн сылне вержылан шотлалтеш.
150 метр кӱкшытан курыквуй гыч моткоч мотор сӱрет почылтеш: ужар чодыра да кумда олык, курык йымач шыргыктен йогышо яндар памаш-влак…
Кӱ курыкышто икымше гана школышто тунемме годым лийынам. Тунам шымше-кандашымше классыште тунемше ӱдыр-рвезе-влакым ик арняш походыш намиеныт. Корнына лач Кужэҥер кундемысе Дубровка ял тураште тӱҥалын. Кӱ курык деке икымше кечынак миен шуынна. Шарнымашеш курыкысо шкет шинчыше сурт да памаш гына кодын.
Тулеч вара жап ятыр эртен, ты вер нерген утларак да утларак ойлаш тӱҥалыныт. Кызыт тушко турист-шамыч, школ гыч йоча да туныктышо-влак тӱшкан-тӱшкан мият. Экскурсий дене коштшо-шамычат пурен-лектын коштыт.
Тений август тылзе игечыж дене куандара, кеҥеж пагытым пуйто мыланна шуйынеже. Тидланак кӧра ме изирак путешествийыш тарванышна.
Телефонышто картым чӱктен, палемдыме верыш вашке миен шуынна. Каласен кодынем, Кӱ курыкыш миен шуаш асфальт гыч пасу корныш волыман, вара иктаж 3 меҥгым пасу да чодыра дене кудалман. Корно пеш уда, йӧра кеч игече сай лийын. Уке гын, йолынат пураш логалеш ыле.
Миен шумеке, ме эн ончыч тошто суртым ужна. Шукынжо палат, очыни, тушто ондак шкет кова илен. Суртшо пустаҥын гынат, пӧрт йыр кумдыкым ачалыме, шудым солымо.
Вара ме памаш деке волышна. А тыште мыланна вучыдымо сӱрет почылто. Памаш кумдыкым моткоч моторын тӧрлен шындыме: каналтен шинчаш чапле беседке, кужу ӱстембал. Вӱдым налаш лӱмын йӧнештарыме вер. Чыла ончал савырнымеке, чатка кӱвар дене изирак часамла деке кайышна. Молан часамла манын возем? Леведыш ӱмбалне ыресым шогалтыме, садлан мый ончылнына часамла (часовня) манын шоналтышым.
Омсам ӧрынрак почна, у тушто – ӥӱштылаш келыштарыме вер улмаш, да тугай сылне! Ме эсогыл шинчамат карышна. Канде тӱсан купельыште вӱдшӧ шыри-вури йылгыжеш. Пу пырдыжыште кугу окнам пӱчмӧ, тушеч тура кечыйол логалеш, логалеш гына огыл, вӱд дене модмыла коеш. А вӱдшӧ могай яндар! Йӱштылаш ыжна пуро гынат, киднам шӱалтышна.
Кӱ курыкыш пытартыш жапыште шуко еҥ толеш. Туге гынат каналташ йӧнештарыме кумдык ару. Беседке воктене – тулото, туштак чайым шолташ чайник. Воктене пум ямдылен пыштыме, эсогыл товарат туштак кия.
Мемнан мийымына годым ик еҥат лийын огыл. Чыла ончен савырнымеке, беседкыш шична, пеленна кондымо кочкышнам авызлышна, почешна чыла эрыктен шындышна. Вара канистрыш вӱдым темен, Пӱртӱс-Авалан тауштенна, лӱмын йӧнештарыме верыш ший оксам пыштен, мӧҥгеш каяш тарванышна.
Пасу корно дене кудалме годым ваштарешна кок машина логале. Паша кече ыле гынат, еҥ-влак тиде сылне верым ужаш толын каят.
