Корзиҥга я киндерке
Теле касым кузе-гынат кÿчыкемдаш манын, ÿдырамаш-влак ожнысек кидпашам ыштеныт. Тиде йÿла тачат аралалтеш. Теве, мутлан, Шернур район Кугэҥер ялын шочшыжо, Ольга Соколова, могай гына кидпашам огеш ыште! Иктыже – пидмаш.
– Кагаз дене пидмым Инстаграм соцкылыште идалык ончыч ужынам, тудо чылт уа дене ыштыме гай койын. Сайынрак ончалмеке, кагаз дене ыштыме манын умыленам. Икымше гана ты кидпашам ышташ шичмем годым чылажат келшыдыме лийын. Кагаз кÿжгыт 80 мм лийын, спице – 2 мм, эсогыл клейжат ПВА веле лийын. Кызыт гын палем, кузе лийшаш: клей – малярный, спице 50 см кужытан да 1,2-1,5 мм лопкытан, а кагаз 45-48 кÿжгытан (г/м).
Ик газет лаштык гыч 3-4 трубочкым ышташ лиеш. Но тудын экшыкше уло, типографий чия кидым лавырта да кагазшымат шуко пачаш чиалташ кÿлеш. Сандене потребительский кагазым налам. Тушеч кок трубочкым «луктам».
Трубочкым ондак морилке дене чиялтем. Ынже тодышталт манын, кок-кум гана обработкым посна лак дене ыштем. Плёнкыш пÿтырен пыштен, йÿдлан кодем. Тыгай трубочкым ышташ ик кас кая. Вара иже пидаш тÿҥалам. Пидын пытарымеке, лак дене йыгыман. Арвер кугу гын кум-ныл гана йыгаш логалеш. Тыге тудо пу гаяк пеҥгыде лиеш.
Кагазым пу ден ыштат, а мый кагаз дене пу сынан арверым келыштарем.
Эн ончыч киндеркым ыштенам. Тачат аралем. Эн кугу арверым ончалаш гын, вургемым, солыкым опташ корзиҥгам, тыгак пырыслан пöртым йодмо почеш ыштенам. Тыгак ондаксе семын киндым коштыкташ корзиҥгамат пидынам. Кеч пайремыш, кеч иктаж кумалтышыш оптен каяш йöнан, – каласкалыш кидмастар Ольга.
