Константин Ивлев дене пырля кочкаш ямдылен

5-6 августышто Нижний Новгород олаште «Швецария» паркыште палыме шеф-повар, ресторатор, телевӱдышӧ –  Константин Ивлевын «Да, шеф!» гастрофестивальже эртаралтын. Ты пайремыш 133 тӱжем утла еҥ погынен. Нунын коклаште марий рвезе Никита Пчёлкинат лийын. Кузе тушко логалмыж нерген рвезе тыге палдарыш:

– Мый изи годсек кочкаш шолташ йӧратем. Икымше гана куд ияш улмем годым муным жаритлен онченам. Кугурак лийме семын, сийым ямдылме рецепт нелемын. Тачат ты сомылым шукташ йӧратем, эре ойыртемалтше рецептым кычалам. А ты фестивальыш логалмем моткоч оҥай. Шукертсек «Пятница» телеканал дене «Адская кухня», «Адский шеф» телепрограммым ончем. Тушто тӱҥалше да ятыр ий ты аланыште тыршыше повар-влак ӱчашат. А вара Нижний Новгород олаште гастрофестиваль эртыме нерген уверым ужынам. Тушто К.Ивлеват лийшаш ыле. Кочкаш ямдылымым, повар-шамычын тӱҥ призлан ӱчашымыштым шке шинча дене ужаш манын, Дарья таҥем дене тушко тарваненна.
Кок кече жапыште тӱрлӧ площадке пашам ыштен. Мутлан, икымше кечын костюмированный парад, тӱрлӧ ӱчашымаш да кочкышым тамлымаш лийыныт. Кокымшо кечын рекордым шынденыт: 276 литр лимонадым ямдыленыт да тулеч молат.
«Адский шеф» программын икымше сезоныштыжо сеҥыше Вячеслав Вьюникын вуйлатымыж почеш эстафетым поснак палемдынем. Тушто кажне кумылан еҥ командыште кочкаш ыштен кертын. Канде да кече тӱсан вургемым чийыше команде лийын. Ик минут жапыште пареҥге мелнам да «пашот» семын шолтымо муным ямдылен шуктыман ыле.
Шоныдымын-вучыдымын меат Даша дене ты эстафетыш ушненна. Кӱчык жапыште тынар шуко ум пален налынна. А шижмашыже могай! Шеф-поварын вуйлатымыже почеш да ятыр калык ончылно ямдылаш куштылгыжак огыл. Константин Ивлев площадкыш тошкалмек, чон утыр вургыжын. Чылажат моткоч келшен! Пӧлек шотеш мыланна фирменный фартук ден банданым пуэныт.

А мылам куанаш да кугешнаш веле кодеш! Могай «молодец» улыт мемнан мари рвезе-влак!