Колхоз пагыт — поро шарнымаш
Автор — Марина Смирнова.
Шукынжо шке интернет-лаштыкышт полшымо дене мотор вургемыштым ончыктат, кушто канымышт да теҥыз воктене кийымышт дене палдарат. Ала-кӧ гын саска поянлыкым ончыкта. Весе-влак пайрем «лектышышт» дене палдарат. А мый йӧршеш тора-а темылан возем.
Шукертсек чон йодеш.
Шукерте огыл чодыра воктене поҥгым поген коштмо годым кугорно велым кугу йӱк лишеммым кольым. Пуйто, теве-теве пешак шуко да неле технике-влак кудалыт.
Пушеҥге кокла гыч ончен шогем, шӱмем лектын вочшаш гай кӱлтка.
Ончем, чынак, неле технике! Юмо-суксо, шоналтышым — мыняр комба-айн!
Кенета шинчавӱдем лекте. Кумылем шылтен шым керт, чынжымак. Ала куанымем дене, ала чон корштымо дене…
Кок тӱжемше ийла тӱҥалтыште мыйын шочмо верыштем районлан эн кугу пасу кумдыкан, чапле техникан, кум ферман да кугу комплексан, ныл бригадан колхоз «кумыкталте». Тиде совхоз, а варажым колхоз паша йӱк дене мочол мӱгырен! Технике гын — технике! Вольык гын — вольык! Ныл бригаде да кугу мастерской (калыкыште тыге маныныт машина да трактор паркым) тич пашаеҥ. 400 наре еҥлан паша вер лийын! Пашадар ситен. Кажне шошым лучко трактор почела кугорно дене пасум куралаш-тырмалаш кудалыт ыле, шурно шумо дене тынарак комбайн почела пасушко шурным шияш вашкен…
Мый пиалан улам. Тунамсе колхозын историйыштыже мыят ик изи чӱчалтыш улам. Студент пагытыште кеҥеж еда кормам ямдылыше бригадыште лийынам. Кузе ме веселан пашам ыштенна! Кузе паша деч вара кастене мутланен шинчыме, гармонь почешат, гитаре денат муралтен каналтыме.
А кызыт… Ялыште шочын-кушшо айдемын ынде чон шортеш.
Юмылан тау, тунамсе совхозын кугу кумдыкшо кызытат пушеҥге дене огеш пызыралт. Мланде пашам йӧратыше ялысе айдеме тиде пашам умбакыже виктара. Изирак «частникше» кертмыже семын шуаралтеш.
Фотоштем (тора гыч веле налын кертынам) моткоч шуко комбайн шочмо ялем воктене пырчым шиеш. Тиде пашазе технике мемнан колхозын огыл, мемнан районын огыл, но кузе талын чыланат пашам ыштат! Ончен куанет. Кугешнет тыгай калык дене. Тугеже улыт эше чолга еҥ-влак, нуно техникышке шинчаш огыт вожыл! Уло, кӧ, куштылго илышым кычалын, олашке чымен огыл! Улыт эше мланде пашам йӧратыше-влак.
Шочмо верем, иле, тӱзлане!
Авторын фотожо-влак.
