Кидпаша илышемым волгалтара
Ик шер пырче воктек весе возеш, ик тасма дене вес тасма пырля ушнат я шÿртö-влак оҥго почеш оҥгым ешарат… Тыге мастар еҥын кидешыже öрыктарыше арвер-влак шочыт. Нуно чоным куандарат, илышышкына йомакысе шÿлышым пуртат.
Людмила Матвеева (Григорьева) 32 ий Йошкар-Оласе 3-шо номеран школышто технологий предметым вÿда, тыгак йоча-влакым сÿретлаш туныкта. Тыгай корным Людмила Ионовна чон йодмо почеш ойырен налын, изинекак технологийым туныктышо лияш шонен.
Туныктышо бисер дене пидеш, пырчыважык йöн дене картине-влакым тÿрла, пушкыдо модышым урга, крючок дене салфеткым да модыш-влаклан тÿрлö вургемым пидеда. Йоча-влакымат чыла тидым ышташ туныкта.
Кидпашалан туныктышо шкежат школ пагытыште шÿмаҥын. Яра жапыште эре пÿчкеден, пижыктылын, урген. Тыгодым ыштыме арверже весын деч ойыртемалтше манынак тыршен. Туныктышын ойлымыж почеш, йочалан кидпаша – яра жапым эртараш йöн веле огыл. Шерым погет ма, тÿрым тÿрлет але ургет – эреак чытыше да тÿткö лийман. Ласкан шинчен кертман. Тиде йоча-влакым лыпландараш полша. Нуно шкеныштым сайын кучаш тунемыт, арулыкым йöратыше, моторлыкым ужын моштышо лийыт. Тыгодымак шонкалымышт, фантазийышт вияҥеш.
Людмила Ионовна поснак марий курчак-влакым ышташ йӧрата. Тидын нерген туныктышо тыге каласыш:
— Икымше марий курчакем-влак кагаз полшымо дене шочыныт. Молан мый нуным ыштенам? Кидпашам ыштыме годым йоча-влаклан марий калыкын илыш-йÿлаже, тÿвыраже нерген каласкалем. Тыге нуным шочмо кундемыштым йöраташ, калыкым пагалаш туныктем.
Кызыт курчакем-влак утларакше куэм полшымо дене ышталтыт. Интерьерлык курчак-влакым ургем. Мылам чучеш, пуйто кажне курчакын шке койыш-шоктышыжо уло. Кажныже шкешотан, ойыртемалтше лектеш. Нуным ончен, чонышто ласкалыкым шижам, куанем, шӱлыкем мондем. А кидпаша мыйын илышемым волгалтара манын кертам.
