«Кепшылан имне мӱндыркӧ ок кай»
… але «Йочалан кепшылым руымо йӱла»
Изи айдеме кушкеш, вийым налеш, йолӱмбак шогалаш тӧча. Йоча чӱчкыдын шӱртньылеш, камвозеш але куштылгын огеш ошкыл гын, кугезына-влак «кепшылым руэныт». Марий калыкнан тиде йӱлаже таче мартеат шуко вере аралалтын. Ойырымо кечын лӱмынак киндым пыштат, сортам чӱктат да Шочынава Юмылан, Сурт Юмылан пелештат, «йоча пеҥгыдын ошкылжо, тудын ончыкылык илыш-корныжо волгыдо да куштылго лийже» манын йодыт. Кепшыл руымо йӱлам ешысе кугурак ийготан еҥ шукта. Йочам ошкылыктат (шке семын але иктаж-кӧ вӱда), а тудын шеҥгечынже товар дене йол коклаште пуйто улшо кандырам руымо семын ыштат. Тидын годым иктаж-кӧ йодеш: «Мом ыштет, (руышын лӱмжӧ)?» Вашеш: «Кепшылым руэм» але « (йочан лӱмжӧ) кепшылжым руэм». Кум гана йодман, кум гана вашештыман. Ошкылшо йочам аваже вашлиеш, кидышке налеш да манеш: «Тыйын кепшылетым руэныт, ынде сайын кошташ тӱҥалат».
Кепшылым руымо йӱла ятыр моло калыкынат уло. Кажне калык да тӱрлӧ кундемыште илыше марий-влакат тиде йӱлам тӱрлӧ семын шуктат. Южо вере кепшылым ончыч руат але ты йӱлам омса лондемыште эртарат. Тыгак ты йӱлалан шӱльӧ пучымышым шолтат да кӧршӧкге пӧрт покшелан вераҥдат улмаш. Йырже йочам кум гана коштыктат. Вара ты пучымышым еш дене погынен кочкыт. Еҥ-влак ӱшанат: кепшылым руымо деч вара икшыве куштылгын да лывыргын кошташ тӱҥалеш.
