КАВА ШАРНА… (тӱшкан возымо почеламут)
Автор-влак:
Виктория Матвеева, Эмма Ильина, Дмитрий Веденькин, Людмила Семенова, Татьяна Иванова, Надежда Рыбакова, Татьяна Лапина, Зинаида Поликарпова, Ольга Эльтемерова, Мария Кожевникова, Эдуард Ильин, Светлана Алексеева, Ольга Леухина, Нина Щербакова, Галина Сайтаева, Андрей Николаев, Татьяна Иванова, Светлана Муртазина, Алена Яковлева.
Турня йӱкеш тый поч окнатым,
Кеч йӱр ма, кече шырата.
Кава шарна, кузе кылдалтын
Куанле май ден илышна.
Пеледше май конден пиалым:
Суленна тынысым! Ура!
Тушман кудалтыш саркуралым!
Каваште – сото ӱжара!
Эн шерге кече толын таче,
Йоҥга у муро – «Сеҥымаш!»
Аралыже осал деч сакче,
Тӱняште тыныслык лийшаш.
Война пытен. Сирень пеледын.
Яндар кава. Тыматле май.
Лач шарнымаш чоннам леведын,
Логарыш вочшо кочо гай.
Сӹнгӹмäш кечӹ – соты айо,
Маханьы тӹдӹн шергӹ äк!
Йӹр пеледäлтшӹ сӹлнӹ майын
Выргыжеш йäнгем мӹньӹнäт.
Налам чевер кок тегытвуйым,
Чапкӱ ӱмбак шыман пыштем,
Шоген кӧ тыныс верчын вуйын –
Шарнем! Ом мондо! Тауштем!
Тӱняште тымык лийже манын.
Йырваш волгалтше манын сад,
Кугезына кырен тушманым,
Ыш лӱдыктӧ колымашат.
Чон вургыжын каваш ончалын
Кочамын лӱмжым шарналтем,
Тунамсе миллион салтаклан
Мый таче угыч тауштем…
Чӱчкен шортеш тул курымашлык,
Салтак лӱмеш йоҥгалте залп.
Индешан май – пайрем мо такше?
Мыняр куан – тунар азап…
Мыняре кӱрлын рвезе ӱмыр!
Йоген мыняре шинчавӱд!
Вашмут олмеш чӱчкалтыш шӱдыр,
Салют тулеш когаргыш йӱд.
Мыняр пӱжвӱд да вӱр варналтын
Ты сеҥымашым лишемдаш.
Кертеш мо эртыше мондалтын?
Лиеш мо сусырым эмлаш?
Шарнаш! Шарнаш тулан сар жапым!
Нигӧ, нимо огеш мондалт!
Тушманын шем, вӱран кышажым
Ок сеҥе ӱштын нимоат.
Йӱреш ок мушкылт шарнымашна,
Лумеш ок петырне шижмаш!
Ме тиде сото Сеҥымашнам
Нигӧлан она пу каргаш!
Совет салтакын ыш код чырже –
Пудешт йӱлен фашист ола!
Рейхстаг ӱмбалне лойгыш тисте,
Куан шижмаш тыгак йолга.
Ал тисте – тӱсшӧ Сеҥымашын
Вӱр гай, тул, кече гай сынан.
Кава шарна сар шикшын тамжым…
Ме – курымешлан шарнена.
Рӱжге, ик ешла да йолташла
Пырля сеҥенна! – Вий могай!
Тек элысе чыла окнаште
Пеледше тыныс, сото май!
Валентина Васинкина:
«Огеш кӱл сар, огеш кӱл ойго!» –
Ушештара уэш пайрем.
Тек кажне чонысо тулойып
Йӱла кавалан куанен!
Тек лижӹ кечӹнь пӹлгом ире,
Ӹнжӹ äвäлтӹ тӹдӹм шӹкш.
Мӱлäндӹ вӹлнӹ лижӹ ирӹк
Дä шäрлӹжӹ пеледӹш пыш.
Волгалтше шошо, тыныс лийже!
Куан лиеш тек йырым-ваш.
Куатле Сеҥымашын вийже
Йодеш мемнам илаш, илаш!
Чап лийже лӱмлӧ Сеҥымашлан!
Тек кумылнам пала тӱня:
Пайрем маналтше кечын акшым
Кава шарна. Ме шарнена.
