Эн чолга-влак — ВДНХ ончерыш!
Автор — Виктория Матвеева.
Эртыше кечылаште тиде ончерыш Морко да У Торъял кундемласе «Движение первых» проектын чолга участникше-влак миен коштыныт. Эшежым ВДНХ комплексым онченыт, Моско ола дене палыме лийыныт. Участник-влак дене вашлияш да кутыраш, кумылыштым пален налаш йӧн лектын.
Ольга Андреевна Николаева, Морко район «Движение первых» направленийын кураторжо:
— Моско олаш Морко районын тӱрлӧ школлаж гыч 12 ӱдыр-рвезе дене толмо. Йоча-влак пеш чолга, сайын тунемше, тӱрлӧ мероприятийыште шке мастарлыкыштым тергыше-влак улыт. Каласыман, «Движение первых» проект дене тиде ончерыш Марий Элын чыла район гыч чолга йоча-влак толшаш улыт. Тыгодым корнылан, илымылан тӱлаш огеш кӱл. Йоча-влаклан кугу куан — Моско олаш толаш.
Елисей Баскаков, Морко район Кокласола лицейын тунемшыже:
— Мый луымшо (биолого-химический) классыште тунемам. Тылеч посна музыкальный школым йошкар диплом дене тунем пытаренам, баян дене шоктем. Ӱмаште Кокласола лицейыште «Движение первых» проектым почашлан инициатор лийынам. Кураторна — Людмила Ивановна Анисимова. Ме тунемше-влак дене волонтер пашам шуктен шогена. Эшежым «Большая перемена» конкурсын участникше улам, шке проектем араленам, юнармий нерген мультфильмым ыштенам. Сеҥыше радамыш логалын омыл гынат, тиде мылам кугу сеҥымаш. Моско олаште икымше гана улам. Ончерыште чотшо икымше павильон келшен. Тыште шонен лукмо Алиса ӱдыр мыланна Российын историйжым каласкален, элнан кызытсе сеҥымашыже-влак дене паладарен, мемнан умбакыже кӧ лийын кертмынам ончыктен. Тыште Марий эл гыч моло ӱдыр-рвезе-влак дене палыме лийынам.
Чыла тунемше-влаклан тыгай тыланымашем лиеш: поро пашам эреак ыштен шогыза.
Роман Белов, Морко 6-шо номеран школын тунемшыже:
— Мылам программирований направлений келша, сайт-влакым возем. Моско олаште ончыч ава-ача дене лийынам. Кызыт йоча-влак дене пырля толаш оҥайрак, мом гынат шукырак ончен кошташ лиеш. Мыламат ВДНХ-ште келшен. Кугу лиймеке, лидер-влак коклаште лийнем, шкемын проектым почнем. Ушныза «Движение первых» проектыш, чолга лийза, аралыза Морко районын да Марий Элын чапшым.
Петухова Регина (фотошто), У Торъял район Кузнецово школын тунемшыже:
— Мый 8 классыште тунемам. Сай тунемше улам. Мылам кидпашам ышташ келша. Проект-влакым возем, тӱрлӧ конкурсышто шке вием тергем. Моско олаште икымше гана улам. Ола кугу, мотор, ӧрыктарыше. Тыште студент семын тунемаш толаш кумыл лектын, умбакыже врач лияш шонем. Тунемше-влаклан чолга лияш тыланем, тунеммаште сай шинчымашда лийже.
Бирюкова Анна, У Торъял школын тунемшыже:
— Тунемме деч посна, мылам волейбол келша, почеламут-влакым рушла возем, «Движение первых» проектын пашашкыже чолган ушненам. Ончерыште мылам Российын регионжо-влакым ончаш келшен. Дагестан, Осетий кундем-влак мотор улыт. Марий Элымат ужна. Таза лийза – тыгай мыйын тыланымашем.
Полина Егошина, У Торъял школын тунемшыже:
— Мый мурем, Анна Бирюкова дене пырля ансамбльыш коштына. Тыгак «Движение Первых» проектын чолга участникше улам. Школышто тунемме жапыште Моско олаш толаш, ВДНХ ончерыште лияш иканат шонен омыл ыле. Россий кугу, культура да калык дене поян. Моло тунемше-влакат чолга лийышт, шкеныштын мастарлыкыштым ончыктышт, тыршен тунемышт.
