«CHEVER» БРЕНД НЕРГЕН КОЛЫНДА?
Марий улметым тӱрлӧ йӧн дене ончыкташ лиеш. Мутлан, арнян кечыжым марла возымо палан але марий орнаментан носким чияш. Тыгайже уло мо манын йодыда? Уло! Да южо еҥже тыгай носким чиен коштеш. Арнян кечыжым тыге товатат от мондо!
Тыгай сатум ямдылаш кӧ да мо таратен, «ChEVER» брендын авторжо Дарья Линючева деч рашемдышна.
– Кызыт кок тӱрлӧ носким ямдылена. Тылеч посна кок тӱрлӧ футболкым ыштена. Но нуным налаш манын, мыланна серышым возен, йодыш-влакым рашемден, налаш лиеш.
Тыгай сынан сатум ышташ шкемын йодмашем (спрос) таратен.
Маркетплейсыште шуко гана марий вургемым я сӧрастарышым кычалынам, но нимо уке. Лач вес калыкын веле верештынам. Но иктажше шонен муэш манын ӱшаненам, вученам. Тыге тӱрлӧ кундемыште илыше марий-влаклан сатум налаш йӧнан лиеш ыле.
А вара вучымым чарненам да шке кидыш чыла налынам. Тыге эркын мом ыштен кертмем нерген шонкалаш тӱҥалынам.
Брендлан лӱмым кычалме годым икмыняр вариант лийын. Тыге латин буква дене «Чевер» мутым ятыр семын возен онченам. А вара «ever» мутын аҥгличан йылме гыч «ӱмырешлык» манмым шекланенам. Тыге ӱмырешлан мотор – «ChEVER» лӱм кодын.
–УМБАКЫЖЕ, ОЧЫНИ, САТУ ЙӦРВАРЫМ КУМДАҤДАШ ШОНЕДА?
– Мутат уке тыгай шонымаш уло. Умбакыже тӱрлӧ вургем модельым ямдылаш шонена. Кызыт пӧръеҥ носки, футболко да лонгслив проектыште улыт.
– САТУМ НАЛШЕ-ШАМЫЧ УЛЫТ?
– Улыт, но кажне кечын ик семын огыл. Туге гынат йодмаш кажне кечын пура. Ме 19 июнь гыч ужалаш тӱҥалынна, сандене чыла але ончылно.
МУТ ТОЛМАШЕШ:
Дарья Пошкырт кундем Калтаса кундемыште Кугу Кельтей ялын шочшыжо, кызыт Нефтекамск олаште ила.
Дарья дене мутланымеке, мыят тыгай носким налаш кумылаҥым. Тек умбакыжат пашада вораҥын толеш, йодмаш-влак шукемыт, а сату йӧрвар пояҥеш!
