Нелмаш корем, Кушна ер…

Автор — Эдуард Ильин.

Шӱдымарий (Шой-Шудумарь) – мотор, кугу, чатка ял. Тудо Кужэҥер районышто верланен.

Шукертак тыште ом иле гынат, чӱчкыдын толын савырнем. Йоча годсо жапем шарналтем, йолташ-влак дене мутым вашталтем.
Теве тачат толаш йӧн лекте да ончычсо пошкудем Зоя Евгеньевна Олюнина деке пурышым.

Зоя ака порын вашлие. Иктым-весым мутланышыла жап писын эртыш. Шке шочмо вершӧр нергенат йодыштым, шуко оҥай историйым кольым. Мутлан: ял воктенак ик сӧрал вер уло. Нелмаш корем манын лӱмденыт. Телым тиде коремышке кӧ ече дене, кӧ издер дене мунчалташ коштына ыле. А кеҥежым мӧрым поген кочмо.

Молан Нелмаш корем? Шошым тыште шуко вӱд погына, а кӱчык жап гыч йӧршынат огеш код. Пуйто корем уло вӱдым нелеш.

Тораштак огыл Кушна ер верланен. Зоя акам тиде ер нерген тыгерак каласкалыш: «Шукерте ожно тиде верлаште имньыгорно лийын. Ержат тунам кумдарак да келгырак ыле. Телым саде корно дене Морко район Изи Кушна сӱан каен улмаш. Чот поранан игечылан кӧра, ала кочо вӱдшат аҥыртыме дене, нуно корно деч торленыт. Тиде ер гоч кайышыштла ий чытен огыл да уло сӱан калыкшат, имньыжат вӱд йымак каеныт. Тыге тиде ерым Кушна ер манын лӱмденыт. Чын ма, легенде, ынде шонкалаш веле кодеш».