Вучыдымо вашлиймаш
Автор — Виталий Ялаев.
Каныш кече-влак писын гына эртен кайышт. У ийым вашлийме, родо-шочшо деке да ача-авам деке унала миен толмо. Ставрополь могырыш корным кучаш жап шиждымын толын шуо… Самолётлан билетым ончылгоч налме, 7 январьыште кечывал деч вара ватем аэропортыш конден, шокшын öндалын да изишак йокрокланен ужатыш…
Самолётшо мыйым Минеральные Воды ола марте нангая, тушто стоянкыште машинамым коденам ыле.
Самолёт гыч волымеке, Ставрополь марте эше 160 уштыш кайыман. Корнышто йокрок ынже лий манын (да бензинат бакышке окса деч посна ок пуро) кызытсе «Бла-бла-кар» сервис дене чÿчкыдын пайдаланем. Тиде ганат попутчик-влак деч посна шым код: ик рвезе (Алексей) ончычак верым нале, вара эше Москва гыч толшо мужыр дене Минводы ола гыч Ставропольыш пырля толаш мутланен келшышна.
Алексей лÿман пассажирет мылам «вотсапыште» воза, кузе да кушто вашлияш каҥашена… Ончем, тушто лÿмжö Ольош манын возымо (шкенжым шке тыге лÿмден). Возкалаш тÿналмеке пале лие: рвезе Марий Эл Советский район гыч улмаш, тудо Ставропольышто контракт дене службым эрта. СВО-н икымше кечыж гычак тушто кредалеш, шочмо кундемышкыже отпусклан миен, кызыт угыч Шочмо Эл ончылно порысым шуктымо пашаш вашка.
Мутланен келшышна аэропортышто вашлияш да серыш гоч возаш лийдымым корнышто шинчаваш мутланаш. Тыгак лие — Ставрополь марте кок шагат марла, чон почын, чарныде мутланен толна. Коклан муралтенат колтышна…
Рвезым частьышкыже пуртен кодымеке, вес кок попутчикым (нуно корнышто мален толыныт) йодмо верышкышт нангайышым.
Миен шумеке, машина гыч лектын шогалнат, мутым вашталтышна. Мыйже пелештышым: «Башкирийыште кызыт 20 утла йÿштö». «У нас в Удмутрии тоже также», — мане ÿдырамашыже. «Вы удмурты что ли?», — йодам? «Нет, я марийка», — манеш. Калтаса районышто тиде ÿдырамашын изаже ила улмаш, сельсовет вуйлатышылан пашам ышта…
Тыгай ӧрыктарыше вашлиймаш-влак лийыч.
Теве тыге, йолташ-влак, йот Ставрополь олашке, ик машинашке чумырген, кум кундемын (Башкирийын, Марий Элын да Удмуртийын) марий шочыжо-влак пырля пöртылыныт.
Марий тÿнян кумдыкшым висаш ок лий — тидым мый угыч умыленам!
