«Тывырдык» калык-влакым уша
Тений шыже Марий кундемыштына тӱрлӧ мероприятийлан моткоч поян.
Ноябрь тӱҥалтыште Йошкар-Олаш Марий Элысе да Российын тӱрлӧ кундемже гыч 28 куштышо коллектив чумырга. Амалже — Тамара Дмитриева лӱмеш регион кокласе «Тывырдык» фестиваль.
Ты фестиваль нерген Марий Элын сулло артистше, калык усталык рӱдерын методистше Борис Дмитриев кумданрак каласкала:
– «Тывырдык» фестиваль кок ийлан ик гана эртаралтеш. Тений тудо 8-9 ноябрьыште лиеш, куштышо коллектив-влакым кумшо гана чумыра.
Фестивальын тӱҥ шонымашыже — марий куштымашым мемнан республикыштына да марий-влакын тӱшкан илыме регионлаште гына огыл вияҥдаш, Россий мучко марий куштымашым палышт да кушташ тӱҥалышт.
Кок ий ончыч фестивальыш йӧршын вес калыкын коллективше-влакат толыныт. Мутлан, Уфа гыч «Айтуган» калык ансамбль. Нуно лӱмын тиде фестивальлан марий куштымашым, марий семым шымленыт. Куштымашым шындаш манын, лӱмын вургемым ургеныт. Тидлан вет марий калык вургемымат шымлашышт логалын. Тиде пашам ышташ мыняр вийым пыштеныт! «Айтуган» коллектив 2022 ийыште гран-прим сеҥен налын.
Але Стерлитамак гыч «Солнышко» ансамбльым налаш. Марий куштымашым шындаш нуно Российыште кумдан палыме хореограф Михаил Петрович Мурашкым ӱжыныт. Тудо «Ой, луй модеш, луй модеш» куштымашым лӱмынак «Солнышко» ансамбльлан шынден. А тидлан лӱмын марий вургемым ургеныт, чыла шымленыт. Тыгодым коллективыштышт ик марий еҥат уке. Но кузе нуно марла куштат! Тиде коллектив 1-ше степенян лауреат лӱмым сеҥыш.
Фестивальын пайдаж нерген теве мом каласаш лиеш: ямдылалтме годым коллектив-влак марий семым, вургемым шымлат, марий калык нерген утларак пален налыт.
Тений 28 коллектив лиеш. Мо оҥайже, кодшо фестивальыш толшо-шамыч 6 коллектив гына лийыт, утларакше шкенан-шамыч. Молыжо йӧршын у коллектив-влак толыт, нуно икымше гана фестивальыш ушнат.
Номинаций икте лиеш – «Калык куштымаш». Ийгот дене кок категорийлан шелалтыт – 7 ияш гыч 17 ияш марте; 17 ияш да умбакыже.
Марий коллектив-влак кок марий куштымаш гыч ончыктат. Вес регион гыч толшо-влак ик марий куштымашым ончыктат, а весыжым шке ойырат.
28 коллектив кок куштымаш дене кушта, чылаже 56 лектеш! Кажнын шке ойыртемже. Могай лӱман коллектив-шамыч улыт! Мый шкежат вучем, ынде мом ончыктат, мо дене ӧрыктарат, мо дене куандарат!..
