Марий кундем дене палдара
Пытартыш ийлаште туризм алан койын вияҥеш. Мемнан республикнат тидын деч вараш ок код. Статистике почеш турист-влак Марий Элыш кажне ийын шукырак толыт.
А тидлан ятыр паша ышталтеш. Мутлан, Россий мучко Студтуризм программе вияҥ толеш. Тиде пашам «Унагудо» ешнан еҥже Анастасия Сидорова шуктен шога.
Настя студент-влакым путешествийыш кузе тарванаш, мом шотыш налаш — палдара, «Амбассадор студтуризма» семын палемдалтын. Кузе ты радамыш логалын, пален налына.
— Эн ондак конкурс эртаралтын. Тушко йодмашым колтенам. Шке нерген палдаренам, портфолиом ямдыленам. Икмыняр этапым эртенам. Вара амбассадор радамыш пуренам манын увер толын.
Мый шке эл, кундем нерген возем, палдарем. Тыгак тӱрлӧ эл гыч студент-влак дене палыме лиям, университет-влакым ончем да тулеч моло.
Тыгай конкурс кажне ийын эртаралтеш, тушко ушнаш шонышо-шамычлан йодмашым веле колтыман. Умбакыже чыла турышто шке мастарлыкым ончыктыман.
Студтуризм программе полшымо дене Россий Федерацийын тӱрлö субъектышкыже миен толаш лиеш. Тыгак вес регионысо университет дене палыме лияш йӧн уло. Икманаш, путешествийым куштылемда.
