Шкетан театр да у тургым
М.Шкетан лӱмеш Марий драмтеатр у тургымлан ямде. Тидын нерген 27 сентябрьыште эртаралтше пресс-конференцийыште каласкаленыт. У тургымышто могай постановко-влак лийыт? Тидын нерген М.Шкетан лӱмеш Марий драмтеатрын художественный вуйлатышыже Василий Пектеев каласкалыш:
– У театр тургым ӱмашсе гаяк у постановко-влаклан поян лиеш. Тургым почылтмо деч ончыч экспериментальный сценыште «Посадить дерево» у спектакльым модын ончыктенна. А черетан тургымым йӧршеш у, ойыртемалтше «Гамлет. Машина. Цемент» спектакль дене почына. Октябрь мучаште эше ик премьерым, «Китай кува» спектакльым, луктына. Тудым режиссёр Роман Алексеев шында. Вара эше ик премьер лиеш. «Шӱдыран тат» спектакльым режиссёр Алексей Ямаев ямдыла. 2 декабрьыште зритель-влак «Йӧратымашын акше» у постановкым ужыт. Декабрьланак эше ик кугу премьерым палемденна. Тӱрлӧ-тӱрлӧ семан, шуко костюман, «Аладдин» лӱман оҥай спектакльым Светлана Строганова ямдыла. Тылеч посна ме Александр Островскийын «Доходное место» пьесыж почеш спектакльым марла шындаш шонена.
Журналист, Валентин Колумб лӱмеш тоштерым чумырышо Владимир Козловын моткоч оҥай шонымашыже шочын. Тудын марий поэт нерген ятыр материалже погынен. Нунын негызеш пьесым возаш шонымаш уло.
Вашлиймаште театр илыш дене кылдалтше да чоным тургыжландарыше ятыр йодыш тарванен. Ик эн тӱҥ — марий спектакльым ямдылымаш. Шукыж годым кызыт постановко-влак вес йылмыла гыч марлаш кусарыме произведений негызеш ямдылыме улыт. Тидыже марий драматургийын «окшаклымыже» дене кылдалтын. Пытартыш жапыште марла возымо пьесылан шындалтше марий постановко-влак нерген ойлаш гын, Анатолий Мокеевын «Ой, Мичу, ох, Зина», В.Матвеевын «Ава капитал» да З.Долгован «Маринавт-влак» спектакль-влакым веле палемдаш лиеш. Тыгак йоча-влаклан ямдылыме постановко-влак улыт. «Ший Пампалче» (З.Долгова, С.Яндукова) ден «Кум ака-шӱжар» (В.Пектеев) йомак-влак эртыше тургымлаште икмыняр гана тичмаш залым погышт. Но йоча-влакым театрыш савырен кондаш кызыт моткоч неле. Эртыше пресс-конференцийыште тидын нергенат йодыш тарваныш. Василий Александровичын ойлымыж почеш, тидыже театрын ончыкылыкшо нерген тургыжланаш тарата. Марий театрым арален кодаш манын, ончышо-влакым театрыш толаш кумылаҥдаш манын, режиссер-шамычлан тӱрлӧ у йӧным кычалаш логалеш. Кызытсе самырык тукымлан поснак кугу тӱткыш ойыралтеш. Теве у тургымым почшо «Гамлет. Машина. Цемент» спектакльым налаш. Тӱнямбалне кумдан чапланыше произведений да герой-влак — кызытсе илышыште! У ӧрыктарыше йӧн-влак, у ончалтыш, у шижмаш… Чылажымат 6 да 7 октябрьыште театрын сценыштыже ужаш лиеш.
Театрыште паша чарныде шолеш. У тургымлан ямдылалтме деч посна, шке оралтыште тыршыме деч посна театр труппо тӱрлӧ кундемыш лектын коштеда.
– Шукерте огыл Грозный олашке Российысе национальный театр-влакын фестивальышкышт миенна. Тений тудо нылымше гана эртаралтын. Фестивальым почмеке, вес кечынже ме «Путёвка в жизнь» спектакльым ончыктенна. Грозныйышто шуко жап лийын огынал гынат, экскурсий-влак, вес актёр-шамыч дене палыме лиймына шарнымашеш кодыт. Вара ме Ӱпӧ олашке самолёт дене чоҥештенна. «Кугу гастроль» жапыште «Путевка в жизнь», «Ший Пампалче» спектакль-влакым ончыктенна.
Тылеч вара коллективнан ик ужашыже Марий Элыш каен, а вес ужашыже Пошкырт кундемыште кодын да гастрольым умбакыже шуен. Тушто ныл спектакльым ончыктымо. Зритель-влак Марий театрым куанен вашлийыныт, чыла вере гаяк калык зал тич погынен, — каласкалыш М.Шкетан лӱмеш Марий драмтеатрын тӱҥ режиссёржо Роман Алексеев.
