Шкет кодшо сурт
Мотор вер лоҥгаште, кумда олык покшелне, Изи Какшан сер воктене шкет шинчен кодшо сурт нерген палдарынем.
Медведево район Шойбулак администрацийыш пурышо Марий Ушем ял деч эрвел-кечывалвел могырышто иктаж кок меҥге тораште ончыч Малококшайск ял лийын. Кызыт тушто ик пӧрт веле ойганен-йокрокланен шкетак шинчен кодын. Суртшат ынде озаже семынак шоҥгемеш, эркын шолдырга…
Эртыше кечылаште тиде верыш мийымем годым игече поснак мотор ыле. Миен шуаш тӱҥалмемлан суртшат веселанрак кояш тӱҥале, пуйто тудат айдемым ужын да куанен.
Малококшайск ял йӧршеш ынже мондалт манын, ты верым шарныше еҥ-влак пытартыш пӧрт воктене шарнымаш кӱм вераҥденыт. Вет шке жапыштыже тиде ялат йӱк-йӱан дене темын, тыштат паша шолын. Шке шочшыжо-влакым ял Кугу Сарышкат ужатен…
А мый гын тиде суртым изиэм годсек шарнем. Кеҥеж пагыт годым авана мемнам, изирак-шамычым, пеленже шудым солаш шупшкеден. Ме тиде суртыш вӱдым йӱаш але ик-кок мутым вашталташ илалшырак кова деке шогаледен улына. Тудо мыланна моткоч куанен, тӱрлым кутырен, каласкален. Руш кова ыле, Елизавета Корнилова (чаманем, ача лӱмжым ом шарне). Ынде тудо шукертак илыш дене чеверласен. Ӱдырамаш шкетак, марлан лекде илен улмаш, лач шольыжо тудлан полшен шоген. Шарнем, эше школышто тунемме годым ме тимуровский каманде дене тудын деке полышкалаш коштмо.
Авторын фотожо-влак.
