Шекланыза!

Телефон йыҥгырта.
— Алло, — манеш ала-могай пӧръеҥ, — Елена Юрьевнам лиеш?
— Колыштеш тудо, — манам мыет.
Вара фамилием рашемда да изишак гына вучалташ йодеш. Тыгодым ала-кӧлан тушто пуйто «Да-да, нине документ-влакым кабинетыш пурто да пыште» ышталеш. Пашаже пешак шуко манын ончыктынеже витне.
Умбакыже адак мый денем мутланаш пижеш. Мыйже, семынем воштылалын, ызыра тӱткын колыштшыла коям.
— Мый, — манеш, — полиций пашаеҥ улам…
Умбакыже шке должность манмыжым палдара, могай оласе полиций пӧлка гыч улмыжым ойла.
А мыйже йӱкын воштыл колтем. Садет мылам эшеат «кугуначальньык» йӱкым «чӱктен» шында.
— Судышто, — манеш, — воштылаш тӱҥалыда!
Мый адак воштыл колтем.
— Уке вет, шот ок лек вет? — игылтынак манам.
Йыҥгыртыше пӧръеҥ кенета шып лиеш.
— Ойлыза, ойлыза, мылам моткоч оҥай, мом те мылам умбакыже ойлаш тӱҥалыда, — ойлем садетлан.
— Оҥай телевизырыште, чӱктыза да ончыза! — кычкырал пуа саде шояк полиционерет, мыйым кумдан палме «кум букваш колта» да телефоным чарен шуа. Шиже: тиде черетан «окмакым» ондалаш ок лий.
Ок лий. Мыйже палем, кӧ да молан йынгырта…

Йолташ-влак! Телефон дене палыдыме чӱчӱ я кокай-шамыч тендам тӱрлӧ осал увер дене лӱдыктылыт гын, ида ӱшане, ида колышт! Палыза: тыге мошенник-влак пашам ыштат. Нуно полшаш тыршышыла койыт, айдемым шкешт велыш савырен, ӱшанаш таратен моштат. Тидлан лӱмын тунемыт. А тӱҥ шонымашышт эре икте — оксадам поген налаш. Садлан иктаж-могай вучыдымо йыҥгырлан вашештеда гын, шке нерген нимогай информацийым ида ойло, лучо йӧршеш ида мутлане. Молан манаш гын полиций, ФСБ я Следственный комитетын еҥже-влак нигунам нимогай йодышым телефон дене огыт рашемдыл. Чынжымак кӱлеш гын, тендам нуно шкешт деке ӱжшаш улыт.