Шарнет, йолташ?

Шарнет, йолташ, кузе изи годым «Шӱмсем пӧлек» передаче тӱҥалмым вученна, а вара коча-кова дене пырля онченна? Ӱшанем, монден отыл.
Йоҥылыш ом лий гын, кок шагат деч вара ончыктат ыле…

9 мартыште Сеҥымашын кумлымшо идалыкше лӱмеш тӱвыра полатыште Йорга Качын (Павел Филипповын) концертше саде передачын семже почеш тӱҥале. Шторко кӱзен гына шуо, марий диктор Аркадий Сергеевын йӱкшӧ йоҥгалте. Чылт изи годсо пагытыш логалме гай чучо. Концерт мучко шкешотан жап машинаште улмым шижым. Теве гына теҥгече марий дискотекыште йоҥгышо муро шергылте, в вара «Лӱҥгалтыш» ансамбльын але Вероника Корчемкинан мурышт йоҥга. Изиш лиймеке калык ансамбль кушталта. Чын, концертым Вероника Корчемкина, Анатолий Градов, одо фольклор калык ансамбль «Зардон» да марий калык фольклор да этнографий «Марий памаш» ансамбль-влак сӧрастареныт. Тылеч посна кызытсе эстраде мурызо, Йорган йолташыже-влак пайрем кумылым пуртеныт. Концерт жапыште Паша могай гына семӱзгар дене ыш шокто, шотлен ноет. Тыгодым одо да марий ансамбыль-шамыч дене куштышт. Ну кертеш!
Эн вучыдымо артист тиде концертыште Алексей Котлов лийын. Тудым шукынжо DJ Дождик семын палат. Тудат шке мурыжым йоҥгалтарыш да «Йӱр йӱреш» мурым Йорга Каче дене пырля мурышт.

Икманаш концерт ик шӱлыш дене пеш веселан эртыш. Артист-влка калыкым ӧрыктарен да куандарен кертыч! Концертым Аркадий Сергеев ден Генрих Тимиряев вӱденыт.

Валерий Поликарповын архивше  гыч налме фото.