Сарын ветеранже Соня ковай дене…

Автор – Татьяна Салиева.

Апаева Соня Апаевна Пошкырт кундем Мишкан район Коклалоҥго ялыште кугурак ийготан-влак кокла гыч иктыже. Тудын самырык пагытше Кугу сар жапыште эртен. Ӱдырамаш нӧргӧ пагытыштак сарын шучкылыкшым ужын. Кажне вашлиймына годым война нерген мутым луктына да тунамсе илыш сӱрет-влакым радамын шарнаш йодына. Соня Апаевнан ойлымыж почеш, пытартыш жапыште событий радам-влак уш гыч кече еда лектын возыт, йомыт…

Чон почын мутланымына интервью сынан лие. Шкеж нерген ӱдырамаш теве мом каласкалыш.

– Мый 1925 ий 25 сентябрьыште кресаньык ешеш шочынам. Ачам – Абукаев Апай, авам – Ошалче, акам – Меҥас, шольым-влак – Айдон и Антон. Война деч ончыч школышто тунемынам, 4-ше класс марте. Сайын тунемынам. Школыш йыдал дене коштынам, шке куэн ыштыме вургемым чиенам.

– Соня ковай, сар нерген иктаж шарнымашым каласкален кертыда?

– Сарыш ешышытына улшо кум поръеҥге каеныт: ачам да кок изам. Ачам пӧртылын, 1964 ийыште колыш. Война тӱҥалме годым 16 ияш лийынам. Чорайыште кум тылзе трактористлан тунемынам. Имне денат, ораван ЧТЗ трактор денат пасум куралынам. Пасушто тыршенна, кеч-могай моло сомылымат шуктенна. Кушко колтеныт, тушто пашам ыштенна. Тунам чыланат тыге иленыт. Фронтлан полыш кӱлын. Тушко ме тӱрлӧ посылкым колтеденна, салтак-шамычлан шокшо вургемым да молымат.
Мыйым тӱрлӧ юбилейный медаль дене палемденыт.

Вадим Мадияровын фотожо-влак.