Памашъял эрге — тале гармоньчо

Мемнан Марий Элна кугужак огыл, сандене шукын ваш-ваш палена. Шинчаваш от уж гынат, иктаж-кушто тиде але тудо лӱмым колат, айдемым палет.

Мыят Максим нерген колынам, но палыме лийын огынал. А ты гана йӧн лекте. Вучымыдын вашлиймеке, шуко шоныде, «Тый гармонь дене шоктат вет?», — йодым.

«Туге»,- лие вашмут.

«Уф, тугеже тудак», — шоналтышым семынем.

Умбакыже шкеж нерген йодыштым.

Максим Вараксин Параньга кундем Памашъялын эргыже. Изиж годсек рвезе гармоньлан шӱман кушкын.

–  Кочам ачалан изи гармоньым налын пуэн улмаш, но кузе ачам ойла «пылышышкем маска тошкалын, сандене шоктен омыл». А мый изи годсек тиде гармоньым шупшкеденам. Вара авам Шернур пазарыште шке погымо гармоньым налын пуэн. Изиш кугурак лиймеке, йолташ рвезе дене ялысе клубыш гармоньчо Михаил Заболотских деке тунемаш коштынна. Тыге ме кум мурым шокташ тунемынна.

Кызыт гын, Шуйский — шке налме гармонем, эре гаяк пелен коштеш,- каласыш рвезе.

Спорт

Шымше класс деч вара Максим Йошкар-Оласе Олимпийский резерв училищыш тунемаш каен. Куштылго атлетике дене заниматлен, кок ий Российын сборныйжылан курыкыш куршталмаш дене выступатлен. Тыге Ирландийыш миен коштын. Тушто тӱнямбал чемпионатыште 19 верыш лектын. Умбакыже Озаҥ олаш тунемаш пурен улмаш, но ик жап гыч кудалтен да мӧҥгеш шочмо ялышкыже пӧртылын. Вара рвезым армийыш наҥгаеныт. Тунемме пагытыште Максим гармоньым кидыш налын огыл, тидлан жапшат лийын огыл, очыни.

Икымше концерт

Армий деч вара Максим ден йолташыжым, Артур Вараксиным, Памашъял клубыш выступатлаш  ӱжыныт. Рвезе-влак тӱвыра пашаеҥ, журналист, Татьяна Пчёлкинан шинчажлан перненыт. Тыге Татьяна Александровна кок гармоньчым «Воштылаш, товатат, сулык огыл» конкурсыш ӱжын. Тылеч посна Моркышто, музыкант Сергей Пчёлкинын шочмо кечыжлан пӧлеклалтше концертыште выступатленыт. «Тиде пайрем мыланна чот келшен»,- палемдыш Максим.

Ӱжмӧ почеш М. Вараксин  сӱаныштат гармоньым шокта. «Тений  гына але ӱжын огытыл», — ойлыш гармоньчо.

Максим Кристина пелашыж дене Егор эргым ончен куштат.