Ныргында кундемыште…
Одо кундем Карагӧл район Ныргында ялысе книгагудышто «Мудрость» клуб пашам ышта. 16 февральыште ты клубын чолга еҥже-влак черетан вашлиймашым эртареныт. Тудо шочмо йылме темылан пӧлеклатын.
Йылме – калыкын койыш-шоктышыжо, уш-акылже, эртыме корныжо, чон поянлыкше. Йылмыште илыш-йӱла аралалтеш. Тукым гыч тукымыш аралалт толшо йылме поянлык деч шерге тӱняште нимоат уке. Лач тиде шӱлыш Ныргында ял кундемысе калыкым ик ешла ушен, жапым пырля пайдалын эртараш йӧным пуэн. Вашлиймашыш толшо-влаклан тысе тӱвыра пӧрт пеленысе «Купанча» одо ансамбль (Вуйлатыше — В.М.Култашев) ден «Ныргындыш сем» марий ансамбльын мурызыжо-влак (вуйлатыше – Ж.И.Якимова) пайрем кумылым пӧлекленыт.
