Ныл ял гыч иктыже
Шукерте огыл ача лийшем (Анатолий Анатольевич) мыланем родо-тукым нерген возымо тетрадьым конден. Тушто икмыняр тукым укшым ончыктымо. Тыгак ял нергенат изиш возымо ыле, сандене тендамат тиде изи ужаш дене палдарем.
«Мый Киров кундем Яранский район Эҥер мучаш (Шуймар-Заречная) ялыште шочын-кушкынам. Тудо Киров кундемын кечывалвел-касвел ужашыштыже, Шкаланка эҥерын шола могырыштыжо верланен. Воктенак эше кум ял уло: Шуймар-Верховская, Шуймар-Ивановская да Шуймар-Сарафанниково. Марла кузе йоҥгалтмыштым ом шарне.
Марий-влак тиде вер-шӧрыш шукертак толыныт. Но могай пагытыште да кушеч — данный уке. Икте раш — мланде пашам палыше да йӧратыше лийыныт. Чодыра ден пасу илен лекташышт полшен, пукшен, йӱктен.
Эн ондак ты верыште ныл еш илен улмаш. Коклаштышт ик меҥге наре лийын. Оралтышт лапка верыште, вӱд воктене лийын. Сурт олмо верыштымат шарнымыла чучеш.
Эше мыйын самырыкем годым ял гӱжлен, а кызыт илышыжат тушто уке гай…»
2010 ийысе перепись почеш ялыште 11 еҥ ила. Ынде лу ий утла эртен. Шукын даче семын веле миен-коштыт. А вер сылне! Туштак эҥер, чодыра, пасу, олык. Чодыраште коклан шордымат, ир сӧснамат, маскамат ужаш лиеш.
Идалык ончыч мыят ты верыште лийынам. Чынак, сӧрал. Коклан лӱдмашанат. Но тушто ожнысо жапыш пӧртылмыла чучеш. Пуйто жапым мӧҥгеш шеҥгек шӱкалме да мый чыла тидым кино семын ончем. Окна ончылно шогышо машина да кӱсеныште связь деч посна пӧрдалше сото телефон гына 21 курым нерген шарныкта…
