Мыйын ешем – мыйын пиалем
Кажне айдемын пиал нерген шке шонымашыже. Кӧлан гын – тиде окса, а кӧлан гын — тазалык. А мыланем пиал — тиде мыйын ешем.
Мыйын шонымаште, еш деч посна айдеме илен ок керт. Айдемын илышыштыже ешыже уло гын, тиде эн кугу пиал, вет ача-аван йӧратымашым нимо ок вашталте. Икымше ошкылым ача-авамын ласкан ончымо годым ыштенам. Тӱням умылаш, поро ден осалым ойыркалаш, йӧраташ туныктен шогеныт. Ешыште йӧратымаш – тиде мемнан шӱлымӧ юж гай. Неле жап, ӱчашымаш лиеда, но пытартышлан ача-аван йӧратымашышт вашталтдыме кодеш. Ава-ача нунын верч моткоч ойгырат да, иктаж-куш нунышт каят гын, вучат. Туге гын, йоча-влак шке ава-ачаштым пагалышаш да йӧратышаш улыт. Ме кугемына, ава-ача помыш гыч кумда илыш корныш лектына. Кузе мемнам туныктеныт, уш-акылнам пойдареныт, кузе мыланна верч ойгыреныт – чыла тидым ме шке икшыве-влаклан пуэна.
Еш – тиде ача-ава веле огыл, тыгак иза-шольо, ака-шӱжар. Пырля эртена илышын тӱрлӧ йыжыҥже гоч, куан ден ойгым пайлена. Иза-шольо але шӱжар – тиде ӱшанле союзник гай, икте-весыштлан ваш-ваш полшаш ямде улыт. Еш мемнам иктыш уша.
Тӱняште кажне еҥ, сай ешым чоҥен, келшен ила гын, могай сай лиеш ыле. Ешыште икте-весылан эҥертен, полшен илыман.
Мыйын ешыштем тыныслык, йӧратымаш, чытымаш да пагалымаш озалана. Южгунам коклаште умылыдымаш лиеш гынат, мемнан кокла гыч кажныже икте-весынам чыташ тырша. Мый тыгай ешыште илымемлан шкемым пиаланлан шотлем. Авам, ачам, изам коклаште шӱмемлан ласкан чучеш. Мыйын ешем — мыйын вием! Тудо мылам нимо дечат шерге.
Автор — Шамеева Влада,
Татарстан кундем Агрыз район Буймо школ, 9-ше класс.
Туныктышо: Эмма Николаевна Ильина.
