«Муро юж гай кӱлеш», –
манеш М.Шкетан лӱмеш Марий драмтеатрын уста артистше, мурызо Иван Соловьев.
Театрын тӱнямбалысе кечыже вашеш Иванлан икмыняр йодышым пуышна.
– Йоча годым кӧ лияш шоненат?
– Йоча годым тидын нерген пешыже шонен омыл. Мыланем ече дене кошташ да футбол дене модаш келшен. Историй урокым йӧратенам, 3-4 параграфым ончылгоч лудам ыле. Шарнем, авам дене ола гыч историй дене 10 томан кӱжгӧ книга-влакым налын конденна.
Ик татыште, шарнем, МЧС утарыше лияш шоненам. Кугурак лиймеке, гитар дене шокташ, мураш тӱҥальым. Тидыжак, очыни, артист корныш шӱкалын.
– Артист корныш кузе логалынат?
– Ик шошо кечын Шкетан лӱмеш Марий драмтеатрын режиссержо-влак Роман Алексеев ден Василий Домрачев школышкына толыныт да Москош артистлан тунемаш самырык ӱдыр-рвезе-влакым погымо нерген увертареныт. Такше мый тунам историклан каяш шоненам ыле, экзаменымат кучаш пеш ямдылалтынам, но тыгай пӱрымаш, витне…
– Кузе шонет, артист огыл гын, кызыт могай пашам ыштет ыле?
– Артист ом лий гын, але музыкант, але историй предметым туныктышо лиям ыле, шонем. Кызыт мый шкемым сымыктыш аланыште гына ужам, умбакыже мо лиеш — илыш ончыкта.
– Икымше кугу ролетым шарнет?
– Икымше кугу ролем эше Москошто тунемме годымак модынам, «Русский Секрет» музыкальный спектакльыште Левшан образшым чоҥенам. Тиде роль пеш келша ыле. Мурымашан, куштымашан драматический спекталь. Тудым ме, тунем толмеке, Шкетан театр сценыштат иктаж кум ий модна.
– Ятыр спектакльыште моторын мурет. Мураш театрлан кӧра тӱҥалынат?
– Мураш мыланем ондакат келшен. Муро южгунам мыланем юж гай кӱлеш, ом муро гын, пуйто кошкем, пуйто ала-мом пеш шергым мый дечем поген налыт. Но утыждене мураш сай огыл. Чыла в меру лиеш гын, тиде чын, шонем.
– Тый шуко спектакльыште модат, утларакшым тӱҥ рольышто. Текстым шарнен кодаш неле? Тудым утларакше кушто тунемат: мӧҥгыштӧ але пашаште? Вашкерак шарнен кодаш манын, мом ыштыман?
– Рольын текстым шарнымаш шотышто иктым каласем: тиде мемнан пашана, тыште шке нелылыкше, оҥайлыкше улыт. Южгунам лугалтынат кая, лиеда.
Вашкерак шарнен кодаш манын, эрдене мален кынелын, яндар вуй дене текстым тунемам, южгунам помыжалтам йӱдым да тунемам, тыгаят лиеден. Тыште кажныжын могай улмыж деч шога, ала-кӧ малаш вочмыж деч ончыч тунем возеш, ала-кӧ репетиций годым тунемеш. Ролем кугу огыл гын, пашаште тунемам, но рольым тунемме тиде чыла огыл, тиде образым чоҥымаште тӱналтыш тошкалтыш гына.
– Тау, Иван, йодышланна вашмутым пуыметлан. Эше ик гана саламлена тыйым Тӱнямбалысе театр кече дене, тыланена чапле деч чапле роль-влакым, театрым йӧратыше еҥ-влакым умбакыжат усталыкет дене куандарен шого!
