МАСТАРЛЫКНАМ ВИЯҤДЕНА, МУТВУНДЫНАМ ПОЙДАРЕНА
«Чонволгалтыш» семинар-лабораторий ынде икмыняр ий пашам ышта. Таче кече марте ятыр почеламут, ойлымаш лончылалтын. Шуко произведений газетлаште, Интернет лаштыклаште савыкталтын. Тений почеламут-влакым эсогыл ик книгаш чумырымо. Тудо СВО-што улшо салтак-влаклан пӧлеклалтын.
Почеламут, ойлымаш-влакым технике могырым лончылымо, сылнештарыме йӧн-влакымат радамлыме, ятыр ой-каҥашым темлыме.Ик верыште тошкешташ огыл манын, умбакыже кугурак произведенийым лончылаш кутырен келшыме. Тиде гана ойлымаш да почеламут деч посна драматургийлан жапнам ойырышна.
Погынымаш деч ончыч лабораторийын кажне участникше мӧҥгылан пуымо пашам лудын, шке шонымашыжым ямдылен. Пырля чумыргымек, кажныже шке шонымыжым луктын ойлен. Тылеч посна драматургийлан келшыше правил да теорий нерген каласкалыме. Пример шотеш кок сценым лончылымо.
Кум шагат жапыште пашана чарныде шолын. Драматургий деч ме ойлымаш жанрыш куснышна, Марина Смирнова ден Людмила Семенован возымыштым лудна, лончылышна. Вара Галина Сайтаеван почеламутшым ончална. Размер, ритм, сылнештарыме йӧн нерген эше ик гана ушештарышна, у мут дене палыме лийна.
Тыгай вашлиймаш-влак тылзылан ик гана гына эртаралтыт гынат, моткоч шукылан туныктат, мастарлыкым вияҥдаш, мутвундым пойдараш полшат.
Вес вашлиймашыште кусарымаш темылан ойырена. Кажныже ончылгоч йӧратыме произведенийым кусарен намиена. Ӱшанена, вес занятият тыгак пайдалын эрта, тӱвыргӧ лектышан лиеш.
