Маска, енот, маймыл да молат…
Верблюд, маймыл, енот, маска, имне, каза, кролик, павлин, дикообраз…
Советский район Роҥго селаште улшо ик озанлыкыште янлык-влак улмо нерген ондакак паленам. Шукерте огыл тушко йоча-влак дене миен толаш йӧн лекте.
Роҥго курык вуйышто, ондакысе лесничестве олмышто кызыт пилораме пашам ышта. Тудым икмыняр ий ончыч Йошкар-Ола гыч толшо вате-марий Татьяна ден Максим налыныт. Эн ончыч оҥам ямдылаш тӱҥалыныт, вара эркын янлык-влакым кондеденыт.
Кызыт тыште мыняр янлык улмым иканаште шотленат от пытаре. Тӱжвач ончымаште чылт зоопарк гай коеш. Но калалсен кодыман, тиде зоопарк огыл, тышке кажне кумыланым огыт пурто. Капка воктене кугу пий оролен шога, эше кок пий кудывечыште коштеш.
Пий воктене кум пырысым ужна, нунын кокла гыч иктыже шуэн вашлиялтше урлык.
— Еҥ-влак урлыкым ончен, шкаланышт пийым, пырысым налыт. Изиракышт годым шер теммеш модыт да вара луктын кудалтат. Тыге ме пийым шӱк контейнер воктене муын, мӧҥгына кондышна. Чапле урлык пырысын аллергийже улмылан кӧра тудымат озашт ончаш тореш лийыныт. Ме кондышна, ятыр жап эмленна. Кызыт тудо пеленна ила, — каласалаш тӱҥале Татьяна.
Татьяна — поро, тыматле ӱдырамаш. Мийыме кечын тудо лач янлык-влак коклаште сомылым ыштен коштеш, а Максим пелашыже ныл йолан йолташ-влаклан у илыме пӧлемым чоҥа ыле.
Татьяна мемнам эн ончыч верблюд воктеке конден шогалтыш да пеленна кондымо йокма дене сийлаш темлыш. Верблюд айдеме деке тунемше, кочкышым йоча кид гычат налеш, эсогыл тупышкыжо шындаш тореш огыл. Фото моторын лекше манын, Татьяна верблюдлан вуйым савыралаш кӱштыш. Верблюд чыла умылышыла вуйжым кӱштымӧ семынак савырале.
Вара ме имньым пукшаш кайышна. Имньым оза-влак моткоч йӧратат. Татьянам мый имне ӱмбалне кудалыштмыж годым икмыняр гана ужынам. Имне воктенак шем сӧсна кудалыштеш. Тудым шыллан огыл, а сӧраллан ашнат. Туштак нубийский урлык каза-влак шогылтыт.
Каза-влакым ашнаш тӱҥалме историят пеш оҥай, тудо маскаиге-влак дене кылдалтын.
Кок маскаигым Татьяна ден Максим сонарзе-влак деч налыныт. Нуным сонарзе-влак пийыштым сонарлаш туныкташ манын ашненыт, вес семынже «прикормко» маналтыт. Тыге чодыраш маскаигым луктын колтатат, почешышт пийым колтат. Пий-влак маскаигым кучат, пурыт. Маскаиге-влак пий ваштареш кержылтын ынышт керт манын, нуным огыт пукшо, вийдымым ыштат. Тиде шӱчко сӱретым Татьяна кызытат чон вургыжын каласкала.
Янлык-влакым мӧнгӧ моткоч ярнышым, пурын пытарымым, пеш черлым конденыт. Эн чот маскаиге-влак перчатке деч лӱдыныт, тудым ужмеке, ореныт. Садлан оза-влак кызытат чара кид дене пукшат, чызе олмеш эн ончыч парняштым шупшыктеныт, кызыт кидыштым шупшаш пуат. Мийымына годымат Татьяна кидшым шупшаш пуэн, а тидыже, чынжымак, моткоч ӧрыктарыш.
Маскаиге-влакым кондымеке, нуным пукшаш кӱлын. Эн ончыч ушкал шӧрым пукшаш тӱҥалыныт. Но кум литрым кочмеке, ик шагат гыч мӱшкырышт шужен. Вара Татьяна каза шӧрым пуэн ончен. Ик литр янлык-влаклан кас марте ситен. Тыге оза-влак казам налаш кутырен келшышт.
Татьяна ден Максимын озанлыкыштышт эше шуко моло янлык ила, кажныжын йӧратыме кочкышыжо уло. Мутлан, енот-влак кампетым йӧратат, кагазшымат шке почыт, Эля лӱман кугу маска сосиске деч тореш ок лий, Ева лӱман маймыл кечшудым кугыеҥ-семынак кочкеш, а йогуртым гын изи йоча семын йӧрата. Тугакшат тудо икшыве гаяк: озаже-влак пелен мала, ванныйыште шагат дене мушкылтын кертеш. А эше тудо Татьяна дене сериалым ончаш йӧрата, но киношто осалым ок чыте. Иктаж пӧръеҥ йочам але ӱдырамашым обижатлаш тӱҥалеш гын, Ева озажын кидшым кучен, телевизорыш пуртынеже, тиде пӧръеҥым вурсынеже. Теве тыгай ушан маймыл.
Татьяна эше ик маймылым пӧрт гыч луктын ончыктыш. Тудым чараш огыт лук, еҥ-влакын шакше койышышт деч янлык тӧрланен шуктен огыл. Тиде маймылын шке жапыштыже озаже лийын. Тудо изи йолташыжым йӧратен, сайын ончен. Маймыл тунам чылт айдеме семын илен, пучымышым совла дене кочкын. Но озаже колымеке, тудым контактный зоопаркыш намиен пуэныт. Лач тушто чапле пачерыште илыше изи янлык еҥ-влакын осал койышыштым, илышын торжалыкшым тичмашнек ужын. Эртыше пагыт эркын-эркын мондалтеш гынат, маймыл эшеат айдемылан тӱрыснек ӱшанен ок керт. Туге гынат сай жапысе илышыж гоч койышыжо палдырна. Тудо ӱдырамаш-влак дене шупшалалташ йӧрата, оҥыштым кучен ончалеш. Юбкым чиен толшо-влакым поснак йӧрата, юбкым тыманмеш нӧлтал колта. Чылт пӧръеҥ!
Татьяна ден Максимын озанлыкыштышт кок шагат утла лийынна, озаватын янлык нерген каласкалымыжым тӱткын колыштынна. Илышыштем тыгай еҥ-влакым икымше гана вашлийынам манам гын, йоҥылыш ом лий, очыни. Янлыкым тыге йӧраташ кажныжлан пӱралтын огыл.
Садлан Татьяна ден Максимлан чытымашым да вийым тыланым шуэш.
