Марлан кайыме ялем

Автор — Марина ТИМОФЕЕВА.

Ешем дене Волжский район Шӱргыял (рушла — Пинжан Кукмор) ялыше илена. Ял Учимсола деч кок меҥге тораште верланен. Тыште газ уке, самырык-влаклан паша вер шотыштат пеш неле, садланак ялыште утларакше тошто пӧрт-влакым веле ужаш лиеш, илыше-влак шагалын улыт.

Но тысе вершӧр мылам моткоч келша. Йыр памаш-влак йыргыктат, а вӱдшӧ могай тамле, мамык гай ныжыл! Памаш пӧртым эре уэмдат, тысе верым тӧрленак шогат. Марлан толмо ялыштем южшат моткоч яндар, пӱртӱс ямле! Йыр шӱшпык муро йоҥга, пакчаштак тумна-влак илат, шырчыкше мыняре! Тыштак Поча эҥер йоген эрта, эҥер коремат пешак сылне. Тыштак тумер уло.

Ял кундемыште тӱрлӧ кушкылым муаш лиеш. Мутлан, тыште Йошкар книгаш пуртымо чечкевондым (рушла — «медуница») ужаш лиеш.

Чодырасе чара верлашке мызе-влак толыт. Нуно пеш оҥай улыт, ончен куанет. Сонарзе-влак веле талышнат гын, чыла лӱйылт пытарат…

Ял шӱгар воктене «Вувер кӱ» («Овда кӱ») верланен. Тиде кӱм кораҥдет гын, Вувер (Овда) тӱжвак лектеш манын ойлат калыкыште.

Мемнан пӧрт шеҥгелне пӱя уло, Мачеҥер маналтеш. Ончыч тышан кугу вӱд погынен маныт, йӱштылашат лийын. Ынде вӱд чот пучен. Кажне ийын ялна воктене улшо памаш-влакым эрыктат, почедат, чыла тӧрлаш толашат. А ер теве садак пуча, тудлан вӱд ок сите. Тыгайым ужмеке, тыланыме шуэш: ялна илыже, ший вӱдшӧ эре шыргыктен йогыжо да чылалан ситыже ыле!

Ӱмаште ял воктенысе чодыраште пожар лийын. Ты верыш нимогай технике пурен кертын огыл. Озаланыше тулым тысе калык дене, тӱшка вий дене сеҥышна, пожарлан талышнаш ышна пу.